މާލޭގެ ގެއެއްގެ ތެރޭގައި މަރުވެފައި އޮތް މީހަކު ފެނިއްޖެއެވެ.

ފުލުހުންގެ އިދާރާއިން ބުނީ، މާލޭގެ ގެއެއްގެ ތެރޭގައި ޚަބަރުހުސްވެފައި އޮތް މީހަކު ފެނިގެން ފުލުހުންނަށް ރިޕޯޓްކޮށްފައި ވަނީ، މިއަދުގެ 13:20 ހާއިރު ކަމަށެވެ.

ފުލުހުން އެމީހާ ނަގައިގެން އޭޑީކޭ ހޮސްޕިޓަލަށް ގެންދިޔަ ކަމަށާއި ހޮސްޕިޓަލަށް ގެންދިޔައިރުވެސް އެމީހާ އޮތީ މަރުވެފައި ކަމުގައި އޭޑިކޭ ހޮސްޕުޓަލުން ފުލުހުންނަށް މައުލޫމާތުދީފައިވާކަމުގައި ފުލުހުންގެ އިދާރާއިން ބުނެފައިވެއެވެ.

ފުލުހުންގެ އިދާރާއިން ބުނީ މަރުވެފައި އޮއްވައި ފެނުނު މީހާއަކީ، 43 އަހަރުގެ ދިވެހި ފިރިހެނެއް ކަމަށާއި، މަރުގެ މިމައްސަލަ ތަޙްޤީޤުކުރަން ފަށާފައިވާކަމަށެވެ.

ބައެއް މަސްދަރުތަކުން ހާމަކޮށްފައިވާ ގޮތުގައި މަރުވި އެމީހަކީ، ހެންވޭރުކޮޅު ލޮނުޒިޔާރަތް މަގުގައި ހުރި ގެއަކުން ފެނުނު މީހެކެވެ. އެމީހާ މަސައްކަތްކޮށްފައިވާކަމަށް ބެލެވެނީ، ކަރަންޓް ކޭބަލްތަކެއް ވަގަށް ނެގުމަށް ކަމުގައިވެސް ބައެއް ފަރާތްތަކުން ހާމަކޮށްފައިވެއެވެ. އެހެންނަމަވެސް މިހާތަނަށް، މަރުގެ އެއްމައްސަލައާ ގުޅޭ އިތުރު ތަފްޞީލެއް ފުލުހުން ހާމައެއް ނުކުރެއެވެ.