ރާއްޖޭގައި ޤަވާއިދާއި ޚިލާފަށް އުޅޭ ހުރިހާ ބިދޭސީން އެއް އަހަރުގެ ތެރޭގައި ހޯދައި އަޅުއްވަންޖެހޭ ފިޔަވަޅުތައް އަޅުއްވާނެ ކަމުގައި، މިނިސްޓަރ އޮފް ހޯމް އެފެއާޒް، ޢަލީ އިޙްސާން ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މެމްބަރުންނާއި ސުވާލު ކުރުމުގެ ވަގުތުގައި މެމްބަރަކު ކުރެއްވި ސުވާލަށް ޖަވާބު ދެއްވަމުން، މިނިސްޓަރ ވިދާޅުވީ، ރާއްޖޭގައި ޤަވާއިދާއި ޚިލާފަށް އުޅޭ ބިދޭސީންގެ އަދަދު ގިނަވުމަކީ އެކަމުގެ ސަބަބުން ޤައުމީ ސަލާމަތަށް ނުރައްކާތެރި ކަމެއް ކަމުގައި ޤަބޫލު ކުރައްވާ ކަމަށެވެ.

މިގޮތުން ޤަވާއިދާއި ޚިލާފަށް އުޅޭ ބިދޭސީން ހޯދައި ފޮނުވާލުމުގެ މަސައްކަތް ކުރައްވަމުން ގެންދަވާ ކަމަށާއި، އަދި އެކަން ހައްލު ކުރެއްވުމަށް ޚާއްޞަ ޓާސްކް ފޯހެއްވެސް އެކުލަވާލައިގެން މަސައްކަތް ކުރައްވަމުން ގެންދަވާ ކަމުގައި މިނިސްޓަރ އިހްސާން ވިދާޅުވިއެވެ.

މިނިސްޓަރ ވިދާޅުވީ، ކައުންސިލްތަކުގައި ބިދޭސީންގެ ދަފްތަރެއް ބަލަހައްޓަން ޤާނޫނުން ލާޒިމްކޮށްފައި ވީ ނަމަވެސް ބިދޭސީންގެ ޑާޓާ ބޭސްގެ އެކްސެސް ކައުންސިލްތަކަށް ދެވިފައި ނުވާކަމަށެވެ. އެެހެންވެ ކައުންސިލްތަކަށް އެ ފިންގަ ޕްރިންޓް ޑޭޓާބޭސްއަށް އެކްސެސް ދެވި ފިންގަ ޕްރިންޓް ސްކޭން ކުރާ މޯބައިލް ޑިވައިސްތަކާއި, ފިކްސްޑް ޑިވައިސް ކައުންސިލްތަކާއި ޕޮލިސް ސްޓޭޝަންތަކަށް ދެވި, އެ ތަނަށް އަންނަ ކޮންމެ ބިދޭސީއަކީ އިނގިލި ޖައްސާލީމާ ކާކުތޯ އެނގޭ ވަރު ކޮށްދިނުމަކީ، އަމާޒެއް ކަމުގައިވެސް މިނިސްޓަރ ވިދާޅުވިއެވެ.

ރާއްޖޭގައި ޤަވާއިދާއި ޚިލާފަށް އުޅޭ ބިދޭސީންގެ އަދަދު، ސަރުކާރަށްވެސް ނޭނގެއެވެ.