މިސަރުކާރުން ރާއްޖެ އައިސް ބަނގުލަދޭޝް އިން މަސައްކަތު މީހުން ގެނައުމަށް ހުއްދަ ދިންފަހުން މިހާތަނަށް ރާއްޖެ އައިސްފައިވަނީ 4000 ބަނގުލަދޭޝްގެ މަސައްކަތު މީހުންކަމުގައި، މިނިސްޓަރ އޮފް ހޯމް އެފެއާޒާ އަލީ އިޙްސާން ވިދާލުވެއްޖެއެވެ.

އެމަނިކުފާނު މިހެން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގައި، ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު ޝިފާޢު ކުރެއްވި ސުވާލަށް ޖަވާބު ދެއްވަމުންނެވެ.

މި ސަރުކާރު ވެރިކަމަށް އައި އިރު، ރާއްޖެއަށް ބަނގްލަދޭޝް އިން މަސައްކަތު މީހުން ގެނައުމަށް ކޯޓާ ދިނުން އޮތީ ހުއްޓާލާފައެވެ. އެގޮތަށް ނިންމީ ކޯޓާދިނުމަށް ކަނޑައަޅާފައިވާ އަދަދުތައް ހަމަވުމުންނެވެ.

ރައްޔިތުންގެ މަޖިލީހުގެ ޖަލްސާގައި މިއަދު ވާހަކަފުޅު ދައްކަވަމުން، ހޯމް މިނިސްޓަރ ޢަލީ އިހްސާން ވިދާޅުވީ، ރާއްޖޭގައި ބަނގުލަދޭޝްގެ މީހުން މަސައްކަތް ކުރުމަށް ދޫކުރެވިފައިވާ އެކްޓިވް ވޯކްޕާމިޓްގެ އަދަދަކީ، 135،149 ކަމަށެވެ. އަދި މިސަރުކާރުން އަލުން ކޯޓާ ދޫކުރަން ފެށިފަހުން، ބަނގުލަދޭޝްއިން މީހުން ގެނައުމަށް 5400 ވޯކްޕާމިޓް ދޫކޮށްފައިވާ ކަމަށާއި އޭގެ ތެރެއިން ރާއްޖެއައިސްފައި ވަނީ 4000 އެއްހައި މީހުންކަމުގައިވެސް މިިނިސްޓަރ އިޙްސާން ވިދާޅުވިއެވެ.

ރާއްޖޭގައި ތިބި ބިދޭސީ މަސައްކަތްތެރިންގެ ތެރެއިން އެންމެ ގިނަ މީހުންނަކީ، ބަނގުލަދޭޝް މީހުންނެވެ. ނުރަސްމީ އަންދާޒާތަކުން ލަފާ ކުރާ ގޮތުގައި ރާއްޖޭގައި ޤަވާއިދާއި ޚިލާފަށް އުޅޭ ބަނގުލަަދޭޝް މީހުންނާއި އެކު ރާއްޖޭގައި ތިބި އެޤައުމަށް ނިސްބަތްވާ މީހުންގެ އަދަދު ދޮޅުލައްކައަށްވުރެ މަތިވާނެއެވެ.