މާލޭގެ ރައްޔިތުންނަށް ދިމާވެފައިވާ ބޯހިޔާވަހި ކަމުގެ ދަތިކަން ޙައްލުކުރުމުގެ ގޮތުން، ބިންވެރިޔާ ސްކީމްގެ ދަށުން ގޯއްޗަށް އެދުނު މީހުންގެ ތެރެއިން ގޯތި ލިބޭ މީހުންގެ ތެރޭގައި ބިދޭސީ 10 މީހަކު ހިމެނިފައިވާކަމަށް ބުނެ، އިދިކޮޅު ފަރާތްތަކުން މީސްމީޑިއާގައި ފަތުރަމުން އަންނަ ވާހަކަތައް ހައުސިންގ މިނިސްޓްރީން ދޮގުކޮށްފިއެވެ.

އެމިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން ކުރެއްވި ޓްވީޓެއްގައި ވިދާޅުވީ، ގޯތި ލިބޭ މީހުންގެ ލިސްޓުގައި ބިދޭސީ 3 މީހަކު ހިމެނިފައިވާ ކަމަށާއި އެގޮތަށް ދިމާވެފައި ވަނީ އޮޅުމަކުން ކަމަށެވެ. މީގެ ކުރިން އަކްރަމް ވަނީ އެހެން ދިމާވި ސަބަބުވެސް ތަފްޞީލްކޮށްދެއްވާފައެވެ. އެހެން ނަމަވެސް އިދިކޮޅު ފަރާތްތަކުން ދަނީ ގޯތީގެ މައްސަލައިގައި އާއްމުންގެ ހިތްތަކުގައި ނަފްރަތާއި ފިޠުނަވެރިކަން އުފެއްދުމަށްޓަކައި ދޮގުވާހަކަތައް މީސް މީޑިއާގައި ފަތުރަމުންނެވެ.

އަކްރަމް ވިދާޅުވީ، ގޯތި ލިބޭ މީހުންގެ ދާއިމީ ލިސްޓް ހާމަކުރާނީ، މިހާރު ފާހަގަވެފައިވާ އިތުރު މައްސަލަތައް ބެލުމަށް ފަހު، އެކަންކަން އިޞްލާޙްކޮށްފައި ކަމަށެވެ.

ޖޫން 26 ވަނަ ދުވަހު، އިޢްލާނުކުރި ގޯތި ލިބޭ މީހުންގެ ލިސްޓަށް ޝަކުވާ ހުށައެޅުމުގެ ފުރުޞަތު ވަނީ، ޖުލައި 15 ދުވަހުގެ 23:59 އާއި ހަމައަށް ހުޅުވާލާފައެވެ.