ރާއްޖެއިން މިއަހަރު ހައްޖުގެ އަޅުކަން އަދާކުރުމަށް މައްކާއަށް ދިޔަ ދިވެހި ހައްޖުވެރިއަކު މައްކާގައި ނިޔާވެއްޖެއެވެ.

ނިޔާވެފައި ވަނީ، ރ. މާކުރަތު، މަލަ، މުޙައްމަދު ނަސީމް ޢަލީ (72އ) އެވެ.

އޭނާއަކީ މިނާއިން ގެއްލިގެން ހޯދަމުން ދިޔަ މީހެކެވެ. ހައްޖު ވިލޭރޭއިންފެށިގެން އޭނާ ގެއްލިގެން ހޯދަމުން އަންނަނިކޮށް ސަޢޫދީގެ ކަމާއި ބެހޭ ފަރާތްތަކަށް އޭނާ ފެނިގެން އެމަޢުލޫމާތު މިނިސްޓްރީ އޮފް އިސްލާމިކް އެފެއާޒާއި ޙިއްޞާކޮށްފައި ވަނީ ރޭގެ ދަންވަރުގެ ވަގުތެއްގައި ކަމަށް އެމިނިސްޓްރީން ވަނީ ބުނެފައެވެ.

ސަޢޫދީ ޢަރަބިއްޔާގެ ކަމާއި ބެހޭ ފަރާތްތަކާއި ޙަވާލާދީ މިނިސްޓްރީ އޮފް އިސްލާމިކް އެފެއާޒުން ބުނެފައި ވަނީ، މުޙައްމަދު ނަސީމް ފެނުނީ، ޖަބަލް ނޫރްގެ ކައިރިއަށް ވެއްޓިފައި ވަނިކޮށް ކަމަށާއި، އޭނާ ހޮސްޕިޓަލަށް ގެންދިޔަ އިރުވެސް ނިޔާވެފައިވާ ކަމަށެވެ.

ނަސީމަކީ އަލްޙަރަމައިން ހައްޖު އެންޑް ޢުމްރާ ގުރޫޕުގެ ހަވާލުގައި ހައްޖަށް ދިޔަ މީހެކެވެ. އޭނާއާއެކު އޭނާގެ ޢާއިލާގެ ބައެއް މީހުންވެސް ޙައްޖަށް ދިޔައެވެ.