ފަނޑިޔާރެއްގެ ކުރިމަތީގައި މަޤާމުގައި ހުވައި ކުރަން ނުޖެހޭ، އެހެން ނަމަވެސް ރައީސުލްޖުމްހޫރިއްޔާ މެމްބަރުން ޢައްޔަނުކުރައްވައި ފަތްކޮޅު އަރުވާ މިނިވަން މުއައްސަސާތަކުގެ މެމްބަރުންނަށް ފަތްކޮޅު ދެއްވުމުގައި ޢަމަލު ކުރަމުން އައި އުސޫލާއި އާދަ ރައީސުލްޖުމްހޫރިއްޔާގ އޮފީހުން ބަދަލު ކުރައްވައިފިއެވެ.

2008 ވަނަ އަހަރު އައު ޤާނޫނު އަސާސީ ތަސްދީޤުކުރެވުނު ޤާނޫނު އަސާސީ އާއެކު އުފެދުނު މިނިވަން މުއައްސަސާތަކަށް ރައްޔިތުންގެ މަޖިލީހުގެ ރުހުމާއި އެކު މެމްބަރުން ޢައްޔަނުކުރައްވަނީ ރައީސުލްޖުމްހޫރިއްޔާއެވެ. އަދި އެގޮތަށް ޢައްޔަނުކުރައްވާ މެމްބަރުންގެ ތެރެއިން މަޤާމުގެ ހުވައިކުރަން ނުޖެހޭ މެމްބަރުންނަށްވެސް ޚާއްޞަ ރަސްމިއްޔާތެއް ބާއްވައި ރައީސުލްޖުމްހޫރިއްޔާގެ އަތްޕުޅުން މަޤާމުގެ ފަތްކޮޅު ހަވާލު ކުރެއްވުމާއި އެމެމްބަރަކާއި ރައީސުލްޖުމްހޫރިއްޔާ ބައްދަލު ކުރެއްވުމަކީ، ހިނގަމުން އަންނަ ރިޔާސީ އާދަކާދައިގެ ތެރޭގައި ހިމެނިފައިވާ ކަމެވެ. މީގެ އިތުރުން ކޮމިޝަންގެ މެމްބަރުކަމަށް ޢައްޔަނުކުރައްވާ ބޭފުޅުންގެ ވަނަވަރާއި ފޮޓޯ އާއި ވީޑިއޯއާއިއެކު ރައީސުލްޖުމްހޫރިއްޔާގެ އޮފީހުގެ ރަސްމީ ވެބްސައިޓްގައި ޚަބަރު ޝާއިޢުކުރައްވައެވެ.

އެހެން ނަމަވެސް، މޯލްޑިވްސް ބްރޯޑްކާސްޓިންގ ކޮމިޝަންގެ މެމްބަރު ކަމުގެ މަޤާމަށް ޢައްޔަނުކުރެއްވުމަށް، ހއ. ހޯރަފުށީ ރިވޯޑް، އައިމިނަތު ނުޒުހާއަށް ރައްޔިތުންގެ މަޖިލީހުން ރުހުންދިންތާ، 26 ދުވަސް ފަހުން މިއަދު ރައީސް އޮފީހުން ވަނީ، މިހާތަނަށް އަމަލު ކުރަމުން އައި އުސޫލާއި ރިޔާސީ އާދަކާދަތަކާއި ޚިލާފަށް، އޭނާ މަޤާމަށް ޢައްޔަނުކުރައްވައިފި ކަމުގެ ފަތްކޮޅު، ރައީސް އޮފީހުގެ ސިޓީ ބަހާ މުވައްޒަފުން ލައްވައި ގެއަށް ފޮނުއްވާފައެވެ. އަދި ނުޒުހާ ކޮމިޝަނަށް ޢައްޔަނުކުރެއްވި ކަމުގެ ޚަބަރުވެސް ރައީސުލްޖުމްހޫރިއްޔާގެ އޮފީހުގެ ވެބްސައިޓްގައި ޝާއިޢު ކުރައްވާފައެއް ނުވެއެވެ.

ހިނގަމުން އައި އާދަ އާއި ޚިލާފަށް އެކަން އެގޮތަށް ކުރެއްވި ސަބަބެއް ރައީސުލްޖުމްހޫރިއްޔާގެ އޮފީހުން ހާމައެއް ނުކުރައްވައެވެ. އަދި ދެން ބްރޯޑްކާސްޓިންގ ކޮމިޝަންގެ މެމްބަރުކަމަށް ޢައްޔަނުކުރައްވާ މެމްބަރުންނަށް ފަތްކޮޅު ދެއްވާނީ އެގޮތަށް ކަމެއްވެސް އަދި ރައީސުލްޖުމްހޫރިއްޔާގެ އޮފީހުން ވިދާޅުވެފައެއް ނުވެއެވެ.

ނުޒުހާގެ ކުރިން އެންމެ ފަހުން ބްރޯޑްކާސްޓިންގ ކޮމިޝަންގެ މެމްބަރުކަމަށް ޢައްޔަނުކުރައްވާފައި ވަނީ، ދ. މީދޫ، ބިއްލޫރިވިލާ ޞަފާ ޝަފީޤުއެވެ. އޭނާއަށް މަޤާމުގެ ފަތްކޮޅު ހަވާލުކުރުމުގެ ރަސްމިއްޔާތު ރައީސުލްޖުމްހޫރިއްޔާގެ އޮފީހުގައި ބާއްވަވާފައި ވަނީ، 9 މެއި 2023ގައެވެ.