ކުޑަ ކަމަކުން ވެސް ގިނަ ދަރުމަ ހޯދިދާނެ.

ހަވަނަ އެޕިސޯޑުގައި ޝެއިޙް އިލްޔާސް ޖަމާލް ވާހަކަފުޅު ދެއްކެވީ މައްޔިތާ ވަޅުލެވެންދެން ޖަނާޒާގައި ބައިވެރިވުމުގެ މާތްކަމާ ގުޅޭ ގޮތުން. 

ނަބިއްޔާ ޙަދީޘް ކުރައްވާފައިވޭ:

(مَنْ شَهِدَ الجَنَازَة حَتَّى يُصَلِّي فَلَهُ قِيرَاط، وَمَن شَهِدَ حَتَّى تُدفَن كَان لَهُ قِيْرَاطَان. قِيل وَمَا القيراطان قَال: مِثل الجَبَلَين العَظِيمَين) رواه البخاري

”މައްޔިތާގެ މައްޗަށް ކަށުނަމާދު ކުރުމާހަމަޔަށް ޖަނާޒާގައި ބައިވެރިވެއްޖެ މީހާއަށް ޤީރާޠެއް ވެއެވެ. އަދި ވަޅުލުމާ ހަމަޔަށް ބައިވެރިވެއްޖެ މީހާއަށް ދެ ޤީރާޠު ވެއެވެ. އެހިނދު، ދެންނެވުނެވެ. ދެ ޤީރާޠަކީ ކޮބައި ތޯއެވެ؟ (ޙަދީޘް ކުރެއްވިއެވެ.) އެއީ ނުހަނު ބޮޑު، ބިޔަ ދެ ފަރުބަދަ އެވެ.“

މާނައަކީ ބޮޑު ދެ ފަރުބަދަހާ މިންވަރަށް އޭނާއަށް ސަވާބާއި ދަރުމަ ލިބޭނެ. ބައެއް ރިވާޔަތް ތަކުގައި ޤީރާޠެއްގެ މިޘާލަކީ އުޙުދު ފަރުބަދަ ކަމުގައި ވާރިދުވެފައިވޭ. ތަޞައްވުރު ކޮށްލައްވާ އުޙުދު ފަރުބަދަ! އެ މިންވަރަށް ސަވާބު މި ލިބެނީ ކޮންކަމެއް ކޮންގެންތޯ؟ މާ ބޮޑު ނުވަތަ ބުރަ އުނދަގޫ އަޅުކަމެއް ކޮންގެންތޯ؟ ނޫން. ހަމައެކަނި ޖަނާޒާގައި ބައިވެރިވެގެން. އެހެންކަމުން މިފަދަ ކަންކަމަށް ސަމާލުކަންދެމާތޯ!