ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އިސްލާމީ މަރުކަޒުގައި އޮތް މިއަހަރުގެ އަޟުޙާ ޢީދުގެ ނަމާދުގެ ޖަމާޢަތުގައި ބައިވެރިވެވަޑައިގެން، އެމިސްކިތަށް ނަމާދަށް ދިޔަ އާއްމުންނާއި ބައްދަލުކުރައްވައި ޢީދު ސަލާމް ކުރައްވައިފިއެވެ.

ރައީސުލްޖުމްހޫރިއްޔާ ވަނީ ޢާންމުންގެ ގިނަ ފަރާތްތަކަކާއި ބައްދަލު ކުރައްވައި، ޢީދު ސަލާމްކުރައްވައި، އެފަރާތްތަކަށް ޢީދުގެ ތަޙްނިޔާ ވިދާޅުވެފައެވެ.

މިއަހަރުގެ އަޟުޙާއީދާއި ގުޅިގެން ރައީސުލްޖުމްހޫރިއްޔާ ވަނީ، ދިވެހި އެންމެހައި ރައްޔިތުންނަށާއި، އިސްލާމީ އުއްމަތުގެ އެންމެހައި އަޚުންނާއި އުޚްތުންނަށް ޢީދުގެ ތަޙްނިޔާ އާއި ހެޔޮއެދުންތައް ފޮނުއްވާފައެވެ.

ޢީދުގެ މުނާޞަބަތާއި ގުޅިގެން ރައީސުލްޖުމްހޫރިއްޔާ ފޮނުއްވި ޚިޠާބުގައި، އެމަނިކުފާނު ވަނީ ޢީދުގައި އުފާ ފާޅުކުރާއިރު، މައިންބަފައިންނާ ބައްދަލުކޮށް، އިޙްތިރާމާއި އޯގާތެރިކަމާއެކު ޢީދުގެ ތަހުނިޔާ ކިޔައި ގުޅުން ބަދަހިކުރުމަށާއި، އަނބިދަރިންނަށް ހަދިޔާ ދީ ލޯތްބާއި ކުލުނާއެކު ޢީދުގެ އުފާ ފާޅުކުރުމަށާއި، ގާތްތިމާގެ މީހުންނަށާއި ރައްޓެހި ރަޙުމަތްތެރިންނަށް ޒިޔާރަތްކޮށް، ހިތްހެޔޮކަމާއި އެކުވެރިކަމާއެކު ޢީދުގެ ތަހުނިޔާ ބަދަލުކޮށް އުފާވެރި ހިނިތުންވުމަކާއެކު ކޮންމެ މީހަކާ ވެސް ބައްދަލުކޮށް، މުޖްތަމަޢުގައި ހިތްހަމަޖެހުމާއި އަމާންކަން ފެތުރުމަށް މަސައްކަތްކުރުމަށް ބާރުއަޅުއްވާފައެވެ. އަދި އެމަނިކުފާނު ވަނީ ފަޤީރުންނާއި މިސްކީނުނަށް އެހީތެރިވުމަށާއި، ފޯރުންތެރިކަމުގެ އަހުލުވެރިން އިސްނަގައި، ނިކަމެތިންނަށް އެހީތެރިވުމަށްވެސް ބަރުއަޅުއްވާފައެވެ.