ރާއްޖޭގައި އިހްސާސް ކުރެވޭ ފިނިހޫނުމިން މިއަދު 40 ޑިގްރީއަށް މަތިވެއްޖެއެވެ.

މޫސުމާއި ބެހޭ ޤައުމީ އިދާރާއިން ހާމަކޮށްފައިވާ މައުލޫމާތުގައި ވާގޮތުން، މިއަދުގެ 11:00ގައި ރާއްޖޭގެ ދެ ސަރަހައްދެއްގައި ވަނީ އިހްސާސްކުރެވޭ ފިނި ހޫނުމިން 40.4 ޑިގްރީ ސެލްސިއަށްއަށް ވުރެ މަތިވެފައެވެ. އެއީ، ހދ. ހަނިމާދޫ އަށާއި، ލ ކައްދޫއަށެވެ. އަދި އެނޫން ސަރަހައްދުތަކަށްވެސް އިހްސާސްކުރެވޭ ފިނި ހޫނުމިން ހުރީ 39 ޑިގްރީ ސެލްސިއަސްއަށް ވުރެ މަތީގައެވެ.

މޫސުމާއި ބެހޭ ޤައުމީ އިދާރާއިން ވިދާޅުވީ، އަސްލު ފިނިހޫނުމިނަށްވުރެ އިހްސާސްކުރެވޭ ފިނި ހޫނުމިން މަތި ވަނީ، އެސަރަހައްދެއްގެ ވައިގެ ތެތްކަމަށް އަންނަ ބަދަލުގެ މައްޗަށް ކަމަށެވެ. އިހްސާސްކުރެވޭ ފިނި ހޫނުމިން މިއަދު 40 ޑިގްރީއަށް އެރި ނަމަވެސް، ރާއްޖޭގެ އެވްރެޖް ފިނި ހޫނުމިން ހުރީ 32 ޑިގްރީ ސެލްސިއަސްގައެވެ.

އޭޕްރީލް މަހަކީ ރާއްޖެއަށް އާއްމުގޮތެއްގައި ހޫނު ގަދަ މަހަކަށް ވުމާއިއެކު، ސިއްޙީ ރައްކާތެރިކަމުގެ ފިޔަވަޅުތަކަށް ބޯލެނބުމަށް، މޫސުމާއި ބެހޭ ޤައުމީ އިދާރާއިންނާއި އެޗްޕީއޭއިން ވަނީ އިލްތިމާސްކުރައްވާފައެވެ.