ޔޫއެފާ ޗެމްޕިއަންސް ލީގުގެ ކުއާޓާ ފައިނަލުގެ ގުރުއަތުނެގުން މިއަދު ބާއްވައިފިއެވެ. ޔުއެފާގެ ހެޑްކުއާޓާސް ހުންނަ ސްވިޒަލޭންޑުގެ ނިޔޯންގައި އޮތް މި ހަފްލާގެ ޝަރަފުވެރި މެހެމާނަކީ ޗެލްސީއާއެކު 2012 ވަނަ އަހަރު ޗެމްޕިއަންސް ލީގު އުފުލާލި، ނައިޖީރިއާގެ ޖޯން އޮބި މީކައިލްއެވެ.

ޔޫރަޕްގެ ކްލަބްތަކުގެ މެދުގައި ކުޅޭ އެންމެ ޝަރަފުވެރި މުބާރާތުގެ ކުއާޓާފައިނަލުގައި ފެނިގެންދާނެ އެންމެ ވަރުގަދަ ކުރިމަތިލުމެއް ކަމުގައި ގަބޫލު ކުރެވެނީ، އެންމެ ފަހުގެ ޗެމްޕިއަން މެންޗެސްޓަރ ސިޓީ އާއި، މި މުބާރާތް އެންމެ ގިނައިން ކާމިޔާބުކޮށްފައިވާ ރެއާލް މެޑްރިޑްގެ ކުރިމަތިލުމެވެ. ރެއާލް މެޑްރިޑްވަނީ މި މުބާރާތް 14 ފަހަރު ކާމިޔާބުކޮށްފައެވެ.

އޭގެ އިތުރުން، 14 އަހަރަށްފަހު ޗެމްޕިއަންސް ލީގުގެ ކުއާޓާ ފައިނަލަށް ދަތުރުކުރި އާސެނަލް އާއި ޖަރުމަން ލީގުގެ ޗެމްޕިއަން ބެޔާން މިއުނިކް ބައްދަލު ކުރާ މެޗަކީ، އާސެނަލްގެ ކޯޗު އާޓޭޓާއަށް ޕްރެޝާގައި މަސައްކަތް ކުރެވޭ މިންވަރު ދެނެގަތުމަށް އޮތް ބޮޑު އިމްތިހާނަކަށް ވެގެންދާނެއެވެ.

ކުއާޓާ ފައިނަލްގެ ގުރުއަތުނެގުން

އާސެނަލް – ބެޔާން މިއުނިކް

އެތުލެޓިކޯ މެޑްރިޑް – ބްރޫޝިއާ ޑޯޓްމަންޑް

ރެއާލް މެޑްރިޑް – މެންޗެސްޓަރ ސިޓީ

ޕެރިސް-ސެއިންޓް ޖާމެއިން (ޕީއެސްޖީ) – ބާސެލޯނާ

ކުއާޓާ ފައިނަލުގެ ގުރުއަތު ނެގުމާއެކު، މި މުބާރާތުގެ ފައިނަލަށް ދަތުރު ކުރާނެ މަގު ވެސް މިހާރު މިވަނީ ކަނޑައަޅާފައެވެ. ސެމީ ފައިނަލްގައި އެއްކޮޅުން ބައްދަލު ކުރާނީ އެތުލެޓިކޯ މެޑްރިޑާއި ބްރޫޝިއާ ޑޯޓްމަންޑް ކުޅެގެން މޮޅުވާ ޓީމަކާއި، ޕީއެސްޖީއާއި ބާސެލޯނާ ކުޅެގެން މޮޅުވާ ޓީމެކެވެ.

ދެވަނަ ސެމީގައި ބައްދަލުކުރާނީ އާސެނަލްއާއި ބެޔާން މިއުނިކް މެޗުން މޮޅުވާ ޓީމަކާއި ރެއާލް މެޑްރިޑާއި މެންޗެސްޓަރ ސިޓީ ކުޅެގެން މޮޅުވާ ޓީމެކެވެ.

ކުއާޓާ ފައިނަލްގެ ފުރަތަމަ ލެގުގެ މެޗުތައް ކުޅުމަށް ހަމަޖެހިފައިވަނީ އެޕްރީލް 9-10 ގައެވެ. ދެވަނަ ލެގުގެ މެޗުތައް ކުޅޭނީ ޖެހިގެން އަންނަ ހަފްތާގައެވެ. އަދި ސެމީ ފައިނަލް ފުރަތަމަ ލެގުގެ މެޗުތައް ކުޅޭނީ އެޕްރީލް 30 ވަނަ ދުވަހުއެވެ. ދެވަނަ ލެގު އޭގެ އެއް ހަފްތާ ފަހުންނެވެ.

މުބާރާތުގެ ފައިނަލް މެޗު އޮންނާނީ ޖޫން 1 ވަނަ ދުވަހު އިނގިރޭސިވިލާތުގެ ވެމްބްލީ ސްޓޭޑިއަމްގައެވެ.