އާބާދީއާ ތަރައްޤީ އެއްފަސްކުރުމުގެ ވާހަކައަކީ، ދިވެހިންނަށް އާވާހަކައެއް ނޫނެވެ. އެހެންނަމަވެސް އެއް ސިޓީއެއްގައި ދިރިއުޅޭ ވަރުގެ ބޮޑު އާބާދީއެއް އެންމެ އިމާރާތެއްގައި ދިރިއުޅޭ ވާހަކަވާނީ ދިވެހިންނަށް އާވާހަކައަކަށެވެ.

ޗައިނާގެ ގުއާންޒޫގައި ހުންނަ، ދަ ރިޖެންޓް އިންޓަރނޭޝަނަލް އެޕާޓްމެންޓް ބިލްޑިންގ އަކީ، ރާއްޖޭގެ އެއް އަތޮޅުގައި ދިރިއުޅޭ ވަރަށް ވުރެވެސް ބޮޑު އާބާދީއެއް ދިރިއުޅޭ އިމާރާތެކެވެ. އެ އިމާރާތުގައި ޖުމުލަ ވިހިހާހަށް ވުރެ ގިނަ މީހުން ދިރިއުޅެއެވެ. މިއީ މުޅި ދުނިޔޭގައިވެސް އެންމެ ގިނަ މީހުން ދިރިއުޅޭ އެއް އިމާރާތަކަށް ވާނެއެވެ.

ދަ ރިޖެންޓް އިންޓަރނޭޝަނަލް އެޕާޓްމެންޓް ބިލްޑިންގގެ އުސްމިނަކީ، 206 މީޓަރެވެ. މިއިމާރާތުގައި 39 ފަންގިފިލާ ހިމެނެއެވެ. އަދި ބައެއް ބައިތަކުގައި 36 ފަންގިފިލާ ހުރެއެވެ. މިއީ އެކި ފަންތީގެ އެޕާޓްމަންޓްތައް ހިމެނޭ ޗައިނާގެ އެންމެ ބޮޑެތި އިމާރާތްތަކުގެ ތެރޭގައި ހިމެނޭ އެއް އިމާރާތެވެ. މިއިމާރާތުގެ ފައުންޑޭޝަނުގައިވެސް ދެލައްކަ ފަސްދޮޅަސް ހާސް އަކަ މީޓަރު ހުރެއެެވެ.

Advertisement

މިއިމާރާތް ފަރުމާކޮށްފައި ވަނީ އިމާރާތުން ބޭރަށް ނުގޮސްވެސް އާއްމު ދިރިއުޅުމުގެ ހުރިހާ ބޭނުންތަކެއް ފުއްދޭ ގޮތަށެވެ. މިގޮތުން މިއިމާރާތުގެ ތެރޭގައި ޝޮޕިން މޯލްތަކާއި، ސުޕަމާކެޓްތަކާއި، ރެސްޓޯރެންޓްތަކާއި، ކިޔަވައިދޭ ތަންތަނާއި، ބިއުޓީ ސެލޫންތަކާއި ސްޕާތައް އަދި ބާރ ވެސް ހުރެއެވެ.

އެޕާޓްމެންޓެއްގެ ބެލްކަނި ---

މިއިމާރާތުގައި ދިރިއުޅޭ ޖުމުލަ މީހުންގެ އަދަދު ކަށަވަރެއް ނުވެއެވެ. ބައެއް ފަރާތްތަކުން އަންދާޒާކޮށްފައި ވަނީ އެ އިމާރާތުގައި 10 ހާހާއި 30 ހާހާއި ދެމެދުގެ އަަދަދަކަށް މީހުން ދިރިއުޅޭނެ ކަމަށެވެ.

ޗައިނާގެ ހައުސިންގ ސިޔާސަތުތައް ބައްޓަންކޮށްފައި އޮންނަނީ ވީހާވެސް ގިނަ ބަޔަކަށް އެއްފުރާޅެއްގެ ދަށުން ބޯހިޔާވަހިކަން ދިނުމަށެވެ. ރާއްޖޭގައި ޗައިނާ ސަރުކާރުގެ އެހީގައި ހިންގި ހިޔާ މަޝްރޫޢަކީ، އޭގެ ކުޑަ މިސާލެކެެވެ. ހުޅުމާލެ ފޭސް 2 ގައި ހިޔާގެ 25 ބުރީގެ 16 ޓަވަރު އަޅާފައި ވާއިރު، ކޮންމެ ޓަވަރެއްގައި މަދުވެގެން 2000 މީހުން އުޅޭނެ ކަމަށް އަންދާޒާކޮށްފައިވެއެވެ. އެހެންވީމާ ޗައިނާގެ، ދަ ރިޖެންޓް އިންޓަރނޭޝަނަލް އެޕާޓްމެންޓް ބިލްޑިންގައި ހިޔާގެ 16 ޓަވަރުގައި ދިރިއުޅޭ އަދަދާއި ގާތްކުރާ އަދަދަކަށް މީހުން އެބަ ދިރިއުޅެއެވެ.

ހުޅުމާލެ ފޭސް 2ގައި އަޅާފައިވާ ހިޔާގެ ޓަވަރުތައް --

އެއް އިމާރާތެއްގައި މިހާ ގިނަ އަދަދެއްގެ މީހުން ދިރިއުޅުމަކީ، ރައްކާތެރިކަމެއް ނޫންކަމަށް ބުނެ ބައެއް މީހުން ހިޔާލުފާޅު ކުރާއިރު، އަނެއް ބަޔަކު ބުނަނީ، އިޤުތިޞާދީ ހައްލުތަކަށްޓަކައި އެގޮތް ރަނގަޅު ކަމަށެވެ.