ރާއްޖޭގެ އަތޮޅުތަކުން މާލެއަށް ބަލި މީހުން އުފުލުމަށް، ސީޕްލޭން އެއާ އެމްބިއުލާންސްގެ ޚިދުމަތް މިއަދުންފެށިގެން ފެށުމަށް މޯލްޑިވިއަނުން ތައްޔާރުވެއްޖެއެވެ.

އެ އެއާލައިނުން އިއްޔެ ވަނީ، އެއާ އެމްބިއުލާންސްގެ ގޮތުގައި ބޭނުން ކުރުމަށް ތައްޔާރުކޮށްފައިވާ، ސީޕްލޭން އިއްޔެ ދައްކާލާފައެވެ.

އެއާ އެމްބިއުލާންސްްގެ ގޮތުގައި ބޭނުން ކުރުމަށް ތައްޔާރު ކުރި ސީޕްލޭނަށް ސްޓްރެޗަރގައި މީހަކު އަރުވަނީ -- ފޮޓޯ: މޯލްޑިވިއަން

އައިލެންޑް އޭވިއޭޝަންގެ ޑެޕިއުޓީ މެނޭޖިންގ ޑައިރެކްޓަރ އަލީ ސަލީމް ވިދާޅުވީ، އެއާ އެމްބިއުލާންސްގެ ޚިދުމަތަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅުތަކުގެ ތެރޭގައި ހިމެނޭ ވަރަށް މުހިއްމު ވަޢުދެއް ކަމަށެވެ.

ޢަލީ ސަލީމް ވިދާޅުވީ މިއަދުންފެށިގެން ސީޕްލޭންގެ ޚިދުމަތް ދޭން ފެށޭނެ ކަމަށާއި، އައިލެންޑް އޭވިއޭޝަނާއި ހަވާލުކުރެވުނު އެމަސައްކަތަށް އުޅަނދުތައް ތައްޔާރުކޮށް އެކަން ފުރިހަމަކުރެވިގެން މިދިޔައީ ކަމަށެވެ.

މޯލްޑިވިއަންގެ ޑޭޝް-8 މަރުކާގެ މަތިންދާ ބޯޓެއް އެއާ އެމްބިއުލާންސްއެއްގެ ގޮތުގައި، މާރިޗު މަހުގެ 1 ވަނަ ދުވަހުން ފެށިގެން ވަނީ ބޭނުން ކުރަން ފަށާފައެވެ. ސަރުކާރުން ހާމަކޮށްފައިވާ ގޮތުގައި އެއާ އެމްބިއުލާންސްގެ ގޮތުގައި ތައްޔާރު ކުރެވުނު ސީޕްލޭން ބޭނުން ކުރާނީ، އެއާޕޯޓެއް ނެތް ރަށްރަށުން ބަލި މީހުން އުފުލުމަށެވެ.

ރާއްޖޭގައި މިހާތަނަށް ބަލި މީހުން އުފުލަމުން އައީ މޯލްޑިވިއަންގެ ކޮމާޝަލް ފްލައިޓްތަކުގައެވެ. އޭގެ އިތުރުން މިސަރުކާރު އައުމާއި ހަމައަށް އިންޑިއާއިން ރާއްޖެއަށް ހަދިޔާކޮށްފައި އޮތް ޑޯނިއާ މަތިންދާ ބޯޓުގަޔާއި، ހެލިކޮޕްޓަރުތަކުގައި ބަލި މީހުން އުފުލަމުން އައެވެ.