މާފަރު އެއާޕޯޓުން މިއަދު މިނިކާވަގެއްކަމަށް ބެލެވޭ ޖަނަވާރެއް ފެނިގެން ރިޕޯޓްކޮށްފައި ވާތީ އެކަން ބަލަމުންދާކަމަށް އެމްއެންޑީއެފުން ބުނެފިއެވެ.

މިހާތަނަށް ސިފައިން ކުރި މަސައްކަތުން އެފަދަ ޖަނަވާރެއް އަދި އެފަދަ ޖަނަވާރެއްގެ ފިޔަވަޅުގެ ނިޝާނެއްވެސް ފެނިފައި ނުވާކަމުގައި މާފަރުން ވާހަކަ ދެއްކި ބައެއް މީހުން ވަނީ ބުނެފައެވެ.

މާފަރު އެއާޕޯޓުގެ ރަންވޭގެ ބިއްދަށުން، ބޮޑު ޖަނަވާރެއް ކަމަށް ބެލެވޭ އެއްޗެއް ހިނގާފައި ދާ މަންޒަރު ފެންނަ ވީޑިއޯއެއް ސޯޝަލް މީޑިއާގައި ވަނީ ދައުރުވާން ފަށާފައެވެ. އަދި އެވީޑިއޯއަކީ، މާފަރު އެއާޕޯޓުގައި މަސައްކަތްކުރާ، ބިދޭސީ މުވައްޒަފުންތަކެއް ނަގާފައިވާ ވީޑިއޯއެއް ކަމުގައިވެސް މާފަރު ކައުންސިލުން ވަނީ ރާއްޖޭގެ ބައެއް މީޑިއާތަކަށް މައުލޫމާތު ދީފައެވެ.

މާފަރު އެއާޕޯޓުގެ ރަންވޭ ޓާމިނަލާއި ފިއުލްފާމް ހުންނަ ސަރަހައްދުތައް ފިޔަވައި، އެއާޕޯޓުގެ ބޮޑު ބަޔަކީ ފަޅަށް އޮންނަ ސަރަހައްދުތަކެކެވެ. އެހެންވެ އެއްވެސް ބާވަތެއްގެ ޖަނަވާރެއް އެސަރަހައްދުގައި އުޅޭތޯ ސިފައިން ދަނީ ބަލަމުންނެވެ.

މާފަރު އެއާޕޯޓުގެ ސަރަހައްދުން ފެނުނީ މިނިކާވަގެއް ކަމަށް ބުނެ، ވާހަކަތައް ފެތުރުމާއި އެކު މާފަރުގެ ރައްޔިތުންގެ މެދުގައި ވަނީ ބިރުވެރިކަން އުފެދިފައެވެ. އަދި ހަމަ އެއާއެކު ދައުރުވަމުންދާ ވީޑިއޯއާމެދުވެސް ބައެއް ފަރާތްތަކުން ވަނީ ސުވާލު އުފައްދާފައެވެ.

މިވީޑިއޯއަކީ މޯބައިލް ފޯނަކުން ނަގާފައިވާ ވީޑިއޯ އެކެވެ. ވީޑިއޯގައި ގައި ފެންނަނީ، ތާރުއަޅާފައި އޮތް ތަނެއްގެ ބިއްދޮށު ފަރާތުން، ޖަނަވާރެއްކަމަށް ބެލެވޭ އެއްޗެއް ހިނގާފައިދާ މަންޒަރެވެ. ވީޑިއޯގެ ބެކްގްރައުންޑުން އިވެނީ ބިދޭސީ ބަޔަކު ވާހަކަދައްކާ އަޑެވެ.

މިވީޑިއޯ އާއި ގުޅޭ ގޮތުން ސޯޝަލް މީޑިއާގައި މީހަކު އުފެއްދި އެއް ސުވާލަކީ، ހަމަ ޙަޤީޤަތުގައިވެސް ވީޑިއޯއިން ފެނަްނަ ތަނަކީ މާފަރު އިންޓަރނޭޝަނަލް އެއާޕޯޓުތޯއެވެ. ވީިޑިއޯ ނަގާފައިވާ އެންގަލްއިން ތާރު އަޅާފައިވާ ތަނެއް ފެނުނު ނަމަވެސް އެއީ ރަންވޭއެއް ކަމެއް ޔަޤީނެއް ނޫނެވެ. ފަހަރެއްގައި ރަންވޭގައި ހުދުން ފަވާފައި ހުންނަ ނިޝާންތައް ފެންނަން ނެތީ، ފޯނުގެ ކެމެރާ އެންގަލް ހުރި ގޮތުން ކަމަށް ވެދާނެއެވެ. އެހެން ނަމަވެސް ސޯޝަލްމީޑިއާގައި އެސުވާލު އުފެއްދި މީހާ ކޮށްފައިވާ އެއް ސުވާލަކީ، އެއީ މާފަރު އެއާޕޯޓުނަމަ އެތަނުގެ ދެވަނަ ފޮޓޯއެއް ނުވަތަ ވީޑިއޯއެއް އޮތްތޯއެވެ.

ވީޑިއޯއާމެދު ސޯޝަލްމީޑިއާގައި ޚިޔާލުފާޅުކުރި އެހެން މީހަކު ބުނީ، ދުރުން ފެންނަ އެ އެއްޗަކީ، ވެހިކަލެއް ކަމަށެވެ. އެހެންނަމަވެސް އެ ވީޑިއޯ ޒޫމްކޮށްގެން ބެލުމުން ވީޑިއޯގައި ފެންނަނީ ޖަނަވާރެއްކަން އެނގެއެވެ. އަދި ޒޫމްކޮށްގެން ބެލުމުން އެއީ މިނިކާވަގެއް، 

މާފަރު އެއާޕޯޓުން ފެނުނު އެއްޗަކާއި މެދު އެންމެ ބޮޑަށް ކަންބޮޑުވާމީހުން ކުރާ ސުވާލަކީ އެއީ ހަމަ އަސްލުގައިވެސް މިނިކާވަގެއްތޯއެވެ. މިނިކާވަގެއް ނަމަ، އޭތި ފިލައިގެން އުޅޭނެ ކަމަކަށް ނުބެލެވެއެވެ. އެއީ ކާނާގެ ގޮތުގައި ޝިކާރަކުރެވޭނެ އެހެން ބާވަތްތަކުގެ ޖަނަވާރު އެސަރަހައްދުގައި ނޫޅޭތީ، އެއީ މިނިކާވަގެއް ނަމަ ޝިކާރަ ކުރުމަށް އެހެން ސަރަހައްދުތަކަށް ނުކުންނާނެތީއެވެ. މިނިކާވަގަކީ އިންސާނުންނަށް ހަމަލާދޭ ޖަނަވާރަކަށް ވާއިރު، އޭތި ބޮނދައި އޮންނާނީ ޝިކާރައެއް އަތުލައިގަތުމަށެވެ. އެނޫން ގޮތަކަށް މިނިކާވަގަކީ، ޖަންގަލީތެރެއާ ގަސްތަކުގެ ތެރޭގައި ފިލައިގެން އުޅޭ ޖަނަވާރެއް ނޫނެވެ. އެހެންވެ، މިހާތަނަށްވެސް ދެވަނަ އެހެން މީހަކަށް އެފަދަ ޖަނަވާރެއް މާފަރު އެއާޕޯޓުން ފެނިފައި ނުވާތީ، ވީޑިއޯގައި ފެންނަ ޖަނަވާރަކާއި މެދު ސުވާލު އުފެެދެއެވެ. އަނެއްކޮޅުން މިނިކާވަގަކީ ދުުރު ހިސާބުތަކަށް ފަތާފައި ދިޔުމުގެ ޤާބިލްކަން ލިބިފައިވާ ޖަނަވާރަކަށް ނުވާތީ، މާފަރަށް އެފަދަ ޖަނަވާރެއް އަރައިފާނެ ގޮތަކާއި މެދުވެސް ސުވާލުތައް އެބަ އޮތެވެ.