'ޗާލު' ޕްރޮގްރާމަކީ 'ނޫން.ޑޮޓް.އެމް.ވީ' އިން އެކްސްކުލޫސިވް ކޮށް ގެނެސްދޭ ލައިފް ސްޓައިލްސް އަށް ހާއްސަ ޕްރޮގްރާމެކެވެ.  މި ޕްރޮގްރާމްގެ ފުރަތަމަ ސެގްމަންޓުގައި ހިމެނޭ ވީޑިއޯތައް ހާއްސަކޮށްލާފައިވަނީ އެކިއެކި މުނާސަބާތަކާއި ގުޅުވައިގެން އަމިއްލައަށް ގޭގައިވެސް ވަރަށް ރީއްޗަށް ހިޖާބު އެޅިދާނެ ސްޓައިލްތަކަކަށެވެ. މަޝްހޫރު މޭކަޕް އާޓިސްޓު ރިޒްނާ އަހުމަދު ހޮސްޓުކޮށްދޭ މި ޕްރޮގްރާމްގެ ތިންވަނަ ވީޑިއޯގައި ހިޖާބު ސްޓައިލް ގެނެސްދޭ ފަރާތަކީ ރާޔާާއެވެ.

ރާޔާއަކީ މަޝްހޫރު މޮޑެލްއެކެވެ. ސްޓައިލިސްޓެކެވެ. އަދި އިންސްޓަގްރާމް އިންފުލުއެންސާއެކެވެ. ގިނަ ފަރާތްތަކަކަށް ރާޔާ އެނގެނީ 'ޕިކުލް ޔޫ' ގެ ނަމުންނެވެ. ފުރަތަމަ ދެ ވީޑިއޯގައި ގެނެސްދީފައިވާ މޮޑެސްޓު ސްޓައިލްތަކާއި ހިލާފަށް ރާޔާ މި ގެނެސްދެނީ ތަފާތު ހިޖާބް ސްޓައިލެކެވެ. އެގޮތުން ރާޔާ ގެނެސްދީފައިވަނީ ޓަރބަން ހިޖާބް ސްޓައިލް އަދި ސިލްކް ސްކާފެއް އަޅާނެ ގޮތެވެ.

Advertisement

މި ސްޓައިލްތައް ގުޅޭނީ ކޮންކަހަލަ އޮކޭޝަންތަކަކަށްތޯ އެހުމުން، ރާޔާ ބުނީ ކެޝުއަލް، އެވްރިޑޭ ވެއަރ، އަދި އޮފީހަށް ދިއުމަށް ވެސް އަސްލު މި ސްޓައިލް ހަމަ ރީތިވާނެކަމަށެވެ. މި ވީޑިއޯގައި މޮޑެލްއެއްގެ ގޮތުގައި ބައިވެރިވެފައިވަނީ ސޭމް އެވެ. ސޭމް އަކީ މޮޑެލް އެއްގެ އިތުރުން، ވަރަށް ހުނަރުވެރި އަމިއްލައަށްް ކަންތައްތައް ދަސްކޮށްގެން މަސައްކަތްކުރާ ޓްރެޑިޝަނަލް އާޓިސްޓެއް، ކްރާފްޓާއެއް އަދި އިލުސްޓްރޭޓަރ އެކެވެ.

ޓަރބަން ހިޖާބް ސްޓައިލް ރާޔާ ގެނެސްދީފައިވަނީ ޖާޒީ މެޓީރިއަލްގެ ޝޯލަކުންނެވެ. އެހެންކަމުން، މި ސްޓައިލް ކުރުމަށް އިތުރަށް ޕިނެއް ނުވަތަ ދައްޗެއް ބޭނުމެއްނުވެއެވެ. އަދި ބޭނުންނަމަ ކޮޓޮން ފަދަ މެޓީރިއަލް އަކުން ވެސް މި ސްޓައިލަށް ހިޖާބު އެޅިދާނެކަން ރާޔާ ފާހަގަ ކުރިއެވެ.

ދެވަނައަށް ގެނެސްދިން ސިލްކް ސްކާފް ސްޓައިލާ ގުޅޭގޮތުން ރާޔާ ބުނީ މިއީ ވަރަށް ސިމްޕަލް ސްޓައިލެއް ކަމަށާއި ހަމައެކަނި ދެ ގޮށް ޖަހާލައިގެން މިކަހަލަ ސްކާފް އެޅިދާނެކަމަށެވެ. ރިޒްނާ ފާހަގަ ކުރީ މިހާރު ފެޝަން އިންޑަސްޓްރީގައި މިއީ ވަރަށް މަޝްހޫރު ސްޓައިލެއްކަމަށެވެ. ރާޔާ ފާހަގަކުރީ މި ސްޓައިލް ފަހަކަށް އައިސް މަޝްހޫރުވީ 'ދަ ބަބުޝްކާ' ޓްރެންޑާއި ގުޅިގެން ކަމަށެވެ. އެއީ ރަޝިއާގައި ކުރީގެ އަންހެނުން ސްކާފް އައްސާ ސްޓައިލެކެވެ. މި ދެ ސްޓައިލަކީ ވެސް ޒުވާން އުމުރުފުރައިގެ ކުދިންނާއި ގުޅޭނެ ގޮތަށް ގެނެސްދީފައިވާ ދެ ސްޓައިލެކެވެ.