މޫން ސްޓަރ ޝޫޒް --
ބޭނުމެއް ނުކުރެވޭ އަގުބޮޑު ތަކެތި، 20 މިލިއަން ޑޮލަރުގެ ފައިވާނެއް!
އާއްމު ދިރިއުޅުމުގައި މީހުން ބޭނުންކުރާ ފައިވާނަކީ މާ އަގުބޮޑު އެއްޗެއް ނޫނެވެ. އޭގެ ސަބަބަކީވެސް އޭގެ ދަރަޖަ އާއި ހައިބަތު ދަށްކަމެވެ. އެކަން ދަލީލުކޮށްދޭ ކަމަކީ، އަހަރެމެން ގެއަށާއި މިސްކިތަށް ނުވަތަ އަޅުކަންކުރާ ތަންތަނަށް ވަންނައިރު ފައިވާ ބޭރަށް ދޫކޮށްލާފައި ވަނުމެވެ. އެކަމުން ދޭހަކޮށްދެނީ ފައިވާނަށް އާއްމު ދިރިއުޅުމުގައި މާބޮޑު އަހައްމިއްޔަތުކަމެއް ދެވިފައި ނެތްކަމެވެ. އޭގެ ޤަދަރެއް ނެތްކަމެވެ.
އަހަރެމެން އާއްމު މީހުންނަށް ފައިވާނަކީ މާބޮޑު ލޯތްބެއް ނެތް އެއްޗެއް ނަމަވެސް ދުނިޔޭގެ ބައެއް މީހުންނަށް ފައިވާނެއް ވެފައި ވަނީ އެމީހުންގެ އެންމެ އަގުބޮޑު މުދަލަށެވެ.
ދުނިޔޭގެ އެންމެ އަގުބޮޑު ފައިވާނަކީ، މޫން ސްޓަރ ގެ ނަންދީފައިވާ ފައިވާނެކެވެ. މިފައިވާނަކީ، މިހާތަނަށް ދުނިޔޭގެ އެންމެ އަގުބޮޑު ފައިވާނަށް ވާއިރު، މިފައިވާނުގެ އަގު ޖުމުލަ 19.9 މިލިއަން ޑޮލަރަށް އަރައެވެ.
މޫން ސްޓަރ ޝޫޒް
މޫން ސްޓަރ ގެ ނަންދީފައިވާ މިފައިވާން ތައްޔާރު ކުރީ އިޓަލީގެ ޑިޒައިނަރެއް ކަމުގައިވާ އެންޓޯނިއޯ ވިއެޓްރީއެވެ. އޭނާ އަކީ އެންމެ ފުރަތަމަ ދުނިޔޭގައި 24 ކެރެޓްގެ ރަން ފައިވާނެއްވެސް ހެދި ފުރަތަމަ މީހާއެވެ.
މޫން ސްޓަރ ފައިވާނުގައިވާ ހީލް ހަދާފައިވަނީ ގަނޑު ރަނުންނެވެ. އަދި މި ފައިވާނުގައި 30 ކެރެޓްގެ އަލިމަހާއި، 1576 ވަނަ އަހަރު ދުނިޔެއަށް ވެއްޓުނު ގިނި ހިލައަކުން ނަގާފައިވާ މައުދަންތައްވެސް ބޭނުންކޮށްފައި ވެއެވެ.
މިފައިވާނަކީ ކިތަންމެ އަގުބޮޑު ފައިވާނެއް ނަމަވެސް މިއީ، ފައިވާނެއްގެ އަސްލު މަޤުޞަދުގައި ބޭނުން ކުރުން އެކަށީގެންވާ ފައިވާނެއް ނޫނެވެ. ސަބަބަކީ މިފަދަ އަގުބޮޑު ފައިވާނަކަށް އަރައިގެން އުޅުމަކީ އެއްވެސް މީހަކަށް ރައްކާތެރި ކަމެއް ނޫންކަމަށް ވާކަމެވެ. އެހެންވީމާ 20 މިލިއަންޑޮލަރުގެ އަގުބޮޑު ފައިވާނަކަށް އަރާނެ މީހަކު އޮތީ ނުވެފައެވެ.