ޔޫއެފާ ޗެމްޕިއަންސް ލީގުގެ ގަދަ-16 ގައި އެތުލެޓިކޯ މެޑްރިޑާއި އިންޓަ މިލާން ބައްދަލުކުރި ފުރަތަމަ ލެގު ކާމިޔާބުކޮށްފައިވަނީ 1-0 އިންޓަ މިލާނެވެ. އެތުލެޓިކޯ މެޑްރިޑު ކުއާޓާ ފައިނަލަށް ދަތުރުކުރަންޖެހޭ ރާސްތާ އިތުރަށް ދިގުވީ، ދެވަނަ ލެގުގައި ބުދަ ދުވަހުގެރޭ ކުޅުނު މެޗުން ވެސް އިންޓަ މިލާން ފުރަތަމަ ލީޑު ނެގުމެވެ.

އިންޓަ މިލާނުން ލީޑު ނެގީ މެޗުގެ 33 ވަނަ މިނެޓުގައި ފެޑެރިކޯ ޑިމާކޯ ކާމިޔާބުކުރި ގޯލަކުންނެވެ. ނަމަވެސް އޭގެ ދެ މިނެޓު ފަހުން އެތުލެޓިކޯގެ އެންޓޮނީ ގްރީޒްމަން މެޗުގެ ނަތީޖާ ހަމަހަމަ ކުރިއެވެ.

މެޗުގެ އެގްރިގޭޓް ސްކޯ ބަދަލުކުރުމަށް އެތުލެޓިކޯ ކުރަމުން ދިޔަ މަސައްކަތަށް ކޮންމެވެސް ވަރެއްގެ ލުޔެއް ލިބުނީ، މެޗު ނިމެން 3 މިނެޓަށް ވެފައިވަނިކޮށް މެމްފިސް ޑިޕޭ ކާމިޔާބުކުރި ގޯލާއެކުއެވެ.

ނަތީޖާއެއް ނެރުމަށް ކުޅުނު އިތުރު ވަގުތުގެ ދެ ހާފުން ވެސް އެއްވެސް ޓީމަކަށް ގޯލެއް ކާމިޔާބު ނުކުރެވުމުން، މެޗުގެ ނަތީޖާ ކަނޑައެޅީ ޕެނަލްޓީ ޖަހައިގެންނެވެ.

އެތުލެޓިކޯއަށް ކާމިޔާބު ނުކުރެވުނީ ސައުލް ޖެހި ޕެނަލްޓީ އެކަންޏެވެ. ނަމަވެސް އެޓީމުގެ ކީޕަރު އެތަން ފޫބެއްދިއެވެ. އެތުލެޓިކޯގެ ކީޕަރު ޔާން އޮބްލަކް ވަނީ އެލެކްސިސް ސަންޗޭޒް އަދި ޑެވީ ކްލާސެންގެ ޕެނަލްޓީތައް މަތަކޮށްފައެވެ. އެތުލެޓިކޯ މޮޅުވީ މާޓިނޭޒްގެ ޕެނަލްޓީ ގޯލާ އަމާޒު ނުވެ ހުރަސް ދަނޑިމަތިން ބޭރަށް ދިއުމުންނެވެ.

ގަދަ-ގައި16 ބުދަ ދުވަހުގެރޭ ދެން ކުޅުނީ ބޮރޫޝިއާ ޑޯޓްމަންޑާއި ޕީއެސްވީ އެންދޮވޭންއެވެ. ސިގްނަލް އިޑޫނާ ޕާކުގައި ކުޅުނު މި މެޗު 2-0 އިން ކާމިޔާބުކޮށް، 3-1ގެ އެގްރިގޭޓް ސްކޯއަކާއެކު ކުއާޓާ ފައިނަލުން ޖާގަ ހޯދީ ޑޯޓްމަންޑެވެ.

ޑޯޓްމަންޑަށް ފުރަތަމަ ގޯލު ކާމިޔާބުކޮށްދިނީ މެޗުގެ 3 ވަނަ މިނެޓުގައި ޖޯޑަން ސަންޗޯއެވެ. އަދި އެޓީމުގެ ދެވަނަ ގޯލު ކާމިޔާބުކޮށްދިނީ މެޗުގެ އިތުރު ވަގުތުގައި ރިއުޒްއެވެ.