ޖެހިޖެހިގެން 7 ސީޒަނުގައި ޗެމްޕިއަންސް ލީގުގެ ގަދަ-16 އިން މުބާރާތާ އަލްވަދާއު ކިޔަންޖެހުނު އާސެނަލް އެންމެ ފަހުން ކުއާޓާ ފައިނަލުން ޖާގަ ހޯދައިފިއެވެ. މިއީ އެ ކްލަބުން 2009/10 ސީޒަނަށްފަހު މުބާރާތުގެ ކުއާޓާފައިނަލު ކުޅޭ ފުރަތަމަ ސީޒަން ވެސް މެއެވެ.

އާސެނަލްއިން މި މެޗަށް ނިކުތީ، ފުރަތަމަ ލެގުގައި ލިބުނު 1-0ގެ ގެއްލުން ފޫބެއްދުމަށެވެ. އެގޮތުން ފުރަތަމަ ހާފު ނިމެން 4 މިނެޓަށް ވެފައި ވަނިކޮށް ޓްރޮސާޑް ޖެހި ގޯލާއެކީ، އެގްރިގޭޓް ސްކޯ ހަމަހަމަވިއެވެ. 

މެޗުގެ ފުރިހަމަ ވަގުތު ހަމަވިއިރު އެއްވެސް ޓީމަކަށް އިތުރު ގޯލެއް ކާމިޔާބު ނުކުރެވުމުން، އިތުރު ވަގުތުގެ ދެ ހާފު ކުޅެންޖެހުނެވެ. ނަމަވެސް، މެޗުގެ ނަތީޖާ ނެރެން ޖެހުނީ ޕެނަލްޓީ ޖަހައިގެންނެވެ. މިއީ 2016 ވަނަ އަހަރަށްފަހު ޗެމްޕިއަންސް ލީގުގެ ގަދަ-16 މެޗެއްގައި ޕެނަލްޓީ ޖަހައިގެން ނަތީޖާ ނެރެންޖެހުނު ފުރަތަމަ ފަހަރެވެ. 

ޕެނަލްޓީ ޝޫޓް އައުޓްގައި އާސެނަލްގެ ކީޕަރު ޑޭވިޑް ރަޔާ ވަނީ ޕޯޓޯގެ 2 ޕެނަލްޓީ މަތަކޮށްފައެވެ. ރަޔާ ވިދާލި މި ޕެނަލްޓީ ޝުޓާއެކު، އާސެނަލްއިން މެޗު ކާމިޔާބުކުރީ 5-3 އިންނެވެ. 

މި މުބާރާތުގެ ގަދަ-16 ގެ ފަހު ދެ މެޗު މިރޭ ކުޅޭނެއެވެ. ރާއްޖެ ގަޑިން މެންދަމު 1 ޖަހާއިރު ފެށުމަށް ހަމަޖެހިފައިވާ ފުރަތަމަ މެޗުގައި ބައްދަލުކުރާނީ އެތުލެޓިކޯ މެޑްރިޑާއި އިންޓަ މިލާނެވެ. އަދި ދެވަނަ މެޗުގައި ބައްދަލު ކުރާނީ ބްރޫޝިއާ ޑޯޓްމަންޑާއި ޕީއެސްވީ އެންދޮވޭންއެވެ.