ކުޑަ ކަމަކުން ވެސް ގިނަ ދަރުމަ ހޯދިދާނެއެވެ.

1445 ވަނަ އަހަރުގެ ރަމަޟާން މަހަށް ހާއްސަކޮށް އަޅުގަނޑުމެން ގެނެސްދޭ "ރޯދައާ ހެޔޮ އަމަލު" ޕްރޮގްރާމުގައި ޝެއިޙް އިލްޔާސް ޖަމާލު އޮޅުންފިލުވާދެއްވާނީ އެފަދަ އަމަލުތަކެވެ.

އެގޮތުން ފުރަތަމަ އެޕިސޯޑުގައި ޝެއިޙް އަލިއަޅުވާލެއްވީ މުސްލިމެއްގެ ހާޖަތެއް ފުއްދައިދިނުމުގެ ދަރުމައަށެވެ.

ކީރިތި ރަސޫލާ ޙަދީޘްކުރެއްވިއެވެ: ( لأَنْ أمشيَ مع أخٍ في حاجةٍ ؛ أَحَبُّ إليَّ من أن اعتكِفَ في هذا المسجدِ) صحيح الترغيب

މާނައީ "ހަމަކަށަވަރުން ތިމަންކަލޭގެފާނުގެ މި މިސްކިތުގައި އިޢުތިކާފަށް އިންނެވުމަށްވުރެ، މުސްލިމެއްގެ ކަމެއްގައި އޭނާއާއެކު ވަގުތު ހޭދަކުރެއްވުން ތިމަންކަލޭގެފާނުގެ އަރިހުގައި މާ ހެޔޮކަން ބޮޑެވެ."

ނިކަން ވިސްނަވާ: ނަބަވީ މިސްކިތުގައި ނަމާދެއްކުރުމުން އެއްހާސް ނަމާދުގެ ސަވާބު އެބަ ލިބޭ، އެހެންކަމުގައި ވާނަމަ އެ މިސްކިތުގައި އެތައް ނަމާދެއްކޮށް ޤުރްއާންކިޔަވައި ދުޢާކޮށް ޛިކުރުކުރުމަށްޓަކައި އިޢުތިކާފަށް އިންނަ މީހާއަށް ކިހާ ސަވާބެއް ލިބޭނެތޯ؟

އެކަމަކު ބައްލަވާ: އެއަށްވުރެ މާ ދަރުމަ ބޮޑު، މާ ސަވާބު ގިނަ ކަމެއްވޭ. ކޮން ކަމެއްތޯ؟ އާދެ! އެއީ މީހެއްގެ ޙާޖަތެއް ފުއްދައިދިނުމަށް އޭނާއަށް އެހީތެރިވުމަށްޓަކައި އިޚްލާޞްތެރިކަމާއެކު އޭނާއާއެކު އެ ހޭދަކުރާވަގުތު. މިސާލަކަށް ތިމާގެ އަޚާގެ ގެ ބަދަލުވާހިނދު އޭނާއަށް އެހީތެރިވާނެ މީހަކު ނެތް ނަމަ، އޭނާއަށް އެކަމުގައި އެހީތެރިވުމުގައި ވަގުތު ހޭދަކުރުން. މި ނޫންވެސް ކޮންމެ ކަމެއް.

އާދެ! މި ރޯދަމަހު އަޅުގަނޑުމެން ހެޔޮ ޢަމަލުކުރަމުންދާހިނދު އަޅުގަނޑުމެންގެ އަޚާއަށް ކަމެއްގައި އެހީތެރިވާންޖެހޭފަދަ ޙާލަތެއް އައިސްދާނެ. އެފަދަ ޙާލަތުގައި މިއީ ރޯދަމަހޭ، ހަމައެކަނި އަޅުކަމުގައޭ ވަގުތު ހޭދަކުރާނި ބުނެ، ތިމާގެ އަޚާއަށް އެހީތެރިވުން ދޫކޮށް ނުލައްވާ! އޭނާއަށް އެހީތެރިވެލައްވާ! އެއީ ކުޑަކަމެއް ކަމުގައި ހީވި ނަމަވެސް، އެކަމުން ލިބޭނެ ދަރުމަ ވަރަށް ބޮޑު، ވަރަށް މަތިވެރި.