އިއްޔެ މާލޭ ސިޓީ ކައުންސިލްގެ މުވައްޒަފުން މާލޭގެ މަގުތައް މަތން 38 ޓަނުގެ ކުނި ނަގާފައިވާ ކަމުގައި، މާލޭ ސިޓިގެ މޭޔަރު އާދަމް އާޒިމް ވިދާޅުވެއްޖެއެވެ.

އާޒިމް ވިދާޅުވީ، 12 މާރޗް 2024ވީ ހޯމަދުވަހު 38 ޓަނުގެ ކުނި މާލޭ ސިޓީ ކައުންސިލްގެ ހީވާގި މުވައްޒަފުން މަގުތައް މަތިން ނަގާފައިވާ ކަމަށާއި، ފާއިތުވި 17 ދުވަހުގެ ތެރޭގައި 263.5 ޓަނުގެ ކުނި މާލެ ތެރެއިން ނެގުނު ކަމަށެވެ. އެއީ 25 ފޫޓުގެ 10.54 ކޮނޓޭނަރުގެ ކުނިކަން އާޒިމް ފާހަގަކުރެއްވިއެވެ.

ރޯދަ މަހާއި ދިމާކޮށް ގޭތެރެ ސާފުކުރުމާއި، ބައުފަރުނީޗަރާއި އެހެނިހެން ތަކެތި ބަދަލު ކުރުމަތީ ދިވެހިންގެ ތެރޭގައި އޮތް ޘަޤާފީ އާދައަކަށް ވާއިރު، ކޮންމެ އަހަރެއްގެވެސް ރޯދަމަހާއި ކައިރިވެގެން އަންނައިރު މަގުތައް މައްޗަށް އާއްމު ކުނިއަޅާ މައްސަލަ ބޮޑުވެގެން ދެއެވެ. މިއަހަރު އެކަން ވަކިން ބޮޑުވެގެން ދިޔައިރު، މަގުމައްޗަށް ކުނި އެޅި 100 ވުރެ ގިނަ މީހުން ވަނީ ޖޫރިމަނާވެސް ކޮށްފައެވެ.

އާޒިމް ވިދާޅުވީ، މަގުމައްޗަކީ ކުނި އަޅާ ތަނަކަށް ނުހެއްދެވުމަށް އެދިވަޑައިގަންނަވާ ކަމަށާއި، ދިރި އުޅޭ ގެދޮރާއި ތިމާގެ ވެށި ސާފުކޮށް ބޭއްވުމަކީ އެންމެނަށް އެކަމުގެ ހިތް ފަސޭހަކަން ލިބިގެން ދާނެެ ކަމެއް ކަމަށެވެ.