ކޮންމެ ރަމަޟާން މަހަކު މާލޭގައި ބާއްވާ އެފްއޭއެމް ވެޓެރަންސް ލީގު މިއަދު ފަށާނެއެވެ. ޖުމްލަ 10 ޓީމާއެކު މި އަހަރުގެ މުބާރާތް ފެށުމަށް ހަމަޖެހިފައިވާއިރު، މުބާރާތުގެ މެޗުތައް ކުޅޭނީ ހެންވޭރު ދަނޑުގައެވެ. 

މުބާރާތް ކުރިޔަށްދާނީ ޓީމުތައް ދެ ގްރޫޕަކަށް ބަހާލައިގެންނެވެ. އަދި ކޮންމެ ގްރޫޕަކުން ވެސް އެންމެ ގިނަ ޕޮއިންޓު ހޯދާ ދެ ޓީމު ސެމީ ފައިނަލަށް ދަތުރުކުރާނެއެވެ.  

ގްރޫޕް-އޭ ގައި ހިމެނެނީ މުބާރާތް އެންމެ ފަހުން ކާމިޔާބުކުރި ހުޅުމާލެ ވެޓެރަންސް ކްލަބްގެ އިތުރުން، ޕޮލިސް ކްލަބާއި، ހުއްރިއްޔާ އާއި، ދިވެހި ސިފައިންގެ ކްލަބް އަދި ވިލިމާލެ ޔުނައިޓެޑެވެ. ގްރޫޕް-ބީ ގައި ހިމެނެނީ އެންމެ ފަހުގެ ރަނަރަޕް، ދަ ގްރާންޑޭ ސްޕޯޓްސް ކްލަބާއި، މުއިވެޔޮ، ލެގޫންސް ސްޕޯޓްސް ކްލަބް، ކްލަބް ސްޓެލްކޯ އަދި އެމްއެސް މޭޓްސްއެވެ.

ކްލަބް އިވެންޓްސް އާއި އެފްއޭއެމް ގުޅިގެން ބާއްވާ މި މުބާރާތް ހުޅުވާ މެޗުގައި ކުޅޭނީ، އެންމެ ފަހު ދެ އަހަރުގެ ވެސް ޗެމްޕިއަން، ހުޅުމާލެ ވެޓެރަންސް ކްލަބާއި ވިލިމާލެ ޔުނައިޓެޑެވެ. މި މެޗު ފަށާނީ ހަވީރު 4:30 ގައެވެ.

މި މުބާރާތުގެ އެންމެ ކާމިޔާބު ޓީމަކީ ކްލަބް ވެލެންސިއާއެވެ. އެ ކްލަބުން ވަނީ މި މުބާރާތް ފަސް ފަހަރު ކާމިޔާބުކޮށްފައެވެ.