ރައްޔިތުންގެ މަޖިލީހުގެ މެމްބަރުންގެ ކަންކަން ނިންމުމުގައި ޖުމުލަ އަދަދެއް ކަމުގައި ބަލާނީ 80 ކަމުގައި މަޖިލީހުގެ ތަޅުމުން ފާސްކޮށްފިއެވެ.

ރައްޔިތުންގެ މަޖިލީހުގައި އާއްމު ކޮމިޓީން ފާސްކޮށްގެން، މީގެ ކުރިންވެސް މަޖިލީހުން އަމަލުކުރަމުން ގޮތަށް މަޖިލީހުގެ ޖުމުލަ އަދަދަކީ 80 މެމްބަރު ކަމުގައި، ފާސްކުރެއްވުމަށް މަޖިލީހަށް ހުށައެޅުއްވީ، ވިލިގިލީ ދާއިރާގެ މެމްބަރު ސަޢުދު ޙުސައިނެވެ. މިމައްސަަލައިގައި، މަޖިލީހުގައި ނެގި ވޯޓުގައި، މަޖިލީހުގެ އަދަދަކީ 80 މެމްބަރު ކަމުގައި ބަލައިގެން ކަންކަން ނިންމުމަށް މަޖިލީހުން ފާސްކުރީ، 23 މެމްބަރުންގެ ވޯޓާއި އެކުގައެވެ. ދެކޮޅަށް 2 މެމްބަރަކު ވޯޓު ދެއްވި އިރު، ވޯޓުގައި ބައިވެރިވަޑައިނުގެން 25 މެމްބަރުން ތިއްބެވިއެވެ.

މިމައްސަލަ އާއި ގުޅޭ ގޮތަށް ވާހަކަފުޅު ދައްކަވަމުން ރައްޔިތުންގެ މަޖިލީހުގެ ރައީސް މުޙައްމަދު އަސްލަމް ވިދާޅުވީ، މަޖިލީހުގެ ޖަލްސާއެއްވެސް އެއްވެސް މަސައްކަތެއްވެސް ކުރިޔަށް ގެންދެވޭނީ، މަޖިލީހުގެ ކޯރަމްގައި ދިމާވާ މައްސަލަ ހައްލު ކުރެވިގެން ކަމަށެވެ.

މަޖިލީހުގެ ރައީސް މުޙައްމަދު އަސްލަމް ވިދާޅުވީ، ސްޕްރީމްކޯޓުންކޮށްފައިވާ ޙުކުމް ދެމި އޮތް ކަމަށާއި، އަދި އެކޯޓުން އެނިންމެވުން ނިންމެވީވެސް ޤާނޫނު އަސާސީން އެކޯޓަށް ލިބިގެންވާ ބާރުގެ ތެރެއިން ކަމުގައި އެމަނިކުފާނަށް ޤަބޫލު ކުރެވޭ ހައި ހިނދަކުގައި، އެހުކުމް އެހެން އޮއްވައި އެނޫން ގޮތަކަށް ޢަމަލުކުރެއްވުމަށް ދަތިފުޅުވާ ކަމަށެވެ.

މަޖިލީހުގެ ޤަވާއިދުގެ 49 ވަނަ މާއްދާ އިސްލާޙްކޮށް، މަޖިލީހުގެ އަދަދު ގުނުމުގައި ބަލާނީ މެމްބަރުންގެ ޢަދަދަކީ 80 ކަމަށް، ކޮމިޓީން ނިންމި ގޮތަށް މަޖިލީހުގެ ތަޅުމުން ފާސްކުރުމުން އެމާއްދާތައް ޤާނޫނު އަސާސީއާ ޚިލާފްކަމަށް ބުނެ ސްޕްރީމްކޯޓަށް ހުށައެޅި ބަންޑާރަ ނައިބުގެ ފަރާތުންނެވެ. އެމައްސަލައިގައި ސްޕްރީމް ކޯޓުން ކަނޑައަޅާފައި ވަނީ މަޖިލީހުގެ ޖުމުލަ އަދަދު ކަމުގައި ބަލަން ޖެހޭނީ 87 މެމްބަރުން ކަމަށެވެ. 

19 ވަނަ ރައްޔިތުންގެ މަޖިލިސް ފެށުނު އިރު 87 މެމްބަރުން ތިއްބެވިއެވެ. އެހެން ނަމަވެސް މަޖިލީހުގެ 7 މެމްބަރަކު ސަރުކާރުގެ މަޤާމުތަކަށް ވަޑައިގެންނެވުމަށް ގޮނޑިތައް ދޫކޮށްލެއްވުމާއި އެކު، ރައްޔިތުންގެ މަޖިލީހުގައި ދެމި ތިއްބެވި މެމްބަރުންގެ އަދަދު 80 އަށް މަދުވި އެވެ. އަދި އެ މެމްބަރުން ގޮނޑިތަކުން އިސްތިއުފާ ދެއްވިއިރު، ހިނގަމުންދާ މަޖިލީހުގެ އުމުރު ހަމަވުމާއި ދެމެދު 6 މަސް ދުވަހުގެ މުއްދަތެއް ނެތުމުން އެގޮނޑިތަކަށް މެމްބަރުން އިންތިޚާބު ކުރާކަށް ނުޖެހެއެވެ.