ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުހައްމަދު ލަޠީފާއި ގުޅުވައި ރާއްޖޭގެ މީޑިއާަކުން ފެތުރިވާހަކަތައް އެމަނިކުފާނު ދޮގު ކުރައްވައިފިއެވެ.

އެމަނިކުފާނު އެކްސްގައި ކުރެއްވި ޕޯސްޓެއްގައި ވިދާޅުވީ، އެމަނިކުފާނާއި ގުޅޭ ގޮތުން ފަތުރާފައިވާ ވާހަކަތަކަކީ އެއްވެސް ހަޤީޤަތެއް ނެތް ވާހަކައެއް ކަމަށެވެ. އަދި އެފަދަ ދޮގު ހަދާ މުޖުތަމަޢު ފަސާދަކުރުން ހުއްޓާލުމަށް ގޮވާލައްވާ ކަމުގައިވެސް ނައިބު ރައީސް ވަނީ ވިދާޅުވެފައެވެ.

ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފަށް ރައީސް ޑރ. މުހައްމަދު މުޢިއްޒު ހިލާލީގެއަށް ލައްވާފައިވާ މުވައްޒަފުން ލައްވައި ޖާސޫސް ކުރައްވާތީ، ނައިބު ރައީސް ހިލާލީގެއިން ނުކުމެވަޑައިގެން ހުޅުމާލެއަށް ބަދަލުވެވަޑައިގެންފި ކަމުގައި ރާއްޖޭގެ މީޑިއާއަކުން ވަނީ ރިޕޯޓްކޮށްފައެވެ.

އެހެންނަމަވެސް ރާއްޖޭގެ އެހެން މީޑިއާއަކަށް ދެއްވި ބަސްދީ ގަތުމުގައި ރައީސުލްޖުމްހޫރިއްޔާގެ ނައިބު ވިދާޅުވީ، އެމަނިކުފާނު ނައިބު ރައީސްގެ މަޤާމާއި ހަވާލުވެވަޑައިގެންނެވުމަށްފަހުގައި އަދި ހިލާލީގެއަށް ދިރިއުޅުން ބަދަލުކުރައްވާފައި ނުވާ ކަމަށެވެ.