ހުޅުމާލެ ފޭސް 1 ގައި މަގުމަތީގައި ޕާކުކޮށްފައި އޮތް ކާރެއްގައި ޖެހި އެކްސިޑެންޓްވުމުން، އެ އެކްސިޑެންޓް ފުލުހުންނަށް ރިޕޯޓް ނުކޮށް ދިޔަ ބައެއްގެ މައުލޫމާތު ހޯދަ ފުލުހުން ވީޑިއޯ އާއްމުކޮށްފިއެވެ.

ފުލުހުން މިއަދު އާއްމުކޮށްފައިވާ ވީޑިއޯއެއްގައި ފެންނަނީ ދެން އަންހެނަކު އެމީހުން ދުއްވާފައި ދިޔަ ސައިކަލު ކާރެއްގައި ޖެހި އެކްސިޑެންޓްވެ ވެއްޓުމުން އެސައިކަލް ނަގަން އުޅޭ މަންޒަރެވެ. ފަހުން އެހެން ބަޔަކުވެސް އެތަނަށް އަންނަ އިރު، އެކްސިޑެންޓްވި ސައިކަލުގައި ހުރި އަންހެންމީހާ އާއެކު، ދެން ހުރި މީހާ އެތަނުން ދަނީ އެތަނަށް އަންނަ އެހެން މީހެއްގެ ސައިކަލް ފަހަތުގައެވެ.

އެކްސިޑެންޓްވުމުން ރިޕޯޓް ނުކޮށް ދިޔަ މީހުން ހޯދަން ފުލުހުން އާއްމުކޮށްފައި ވަނީ ސީސީޓީވީ ފުޓޭޖެވެ.

ފުލުހުންގެ އިދާރާއިން ވިދާޅުވީ، އެވީޑިއޯއިން ފެންނަ މީހުންނަކީ، ހުޅުމާލެ ފޭސް 1 ޕޮލިސް ސްޓޭޝަނުން ތަހުގީގުކުރަމުންދާ، އެކްސިޑެންޓް މައްސަލައަކާ ގުޅިގެން އެކްސިޑެންޓް ވުމުން ރިޕޯޓްނުކޮށް ސީން ދޫކޮށް ގޮސްފައިވާ މައްސަލައަކާ ގުޅިގެން ހޯދަންބޭނުންވެ، އެމީހުންނަކީ ކޮންބައެއްކަން ދެނެގަނެވިފައިނުވާތީ ހޯދިފައިނުވާ މީހުންނެވެ.

އެހެންވެ އެ ވީޑިއޯއިން ފެންނަ މީހުންނާ ބެހޭ އެއްވެސް މަޢުލޫމާތެއް ލިބިފައިވާ ފަރާތެއްވާނަމަ އެމަޢުލޫމާތެއް ހުޅުމާލެ ފޭސް 1 ޕޮލިސް ސްޓޭޝަންގެ ނަންބަރު 9980062 އަށް ގުޅުއްވައި ހިއްސާކުރެއްވުން އެދޭ ކަމުގައިވެސް ފުލުހުންގެ އިދާރާއިން ވަނީ ވިދާޅުވެފައެވެ.