އޭއެފްސީ ޗެމްޕިއަންސް ލީގުގެ ކުއާޓާ ފައިނަލުގެ ދެވަނަ ލެގުގައި، ދުނިޔޭގެ އެންމެ މަގުބޫލު އެއް ޝަހްސިއްޔަތު ކަމުގައިވާ ކްރިސްޓިއާނޯ ރޮނާލްޑޯ ކުޅެމުން އަންނަ ސައުދި އަރައްބިއްޔާގެ އަލް ނަސްރުން އަލް އައިނާ ދެކޮޅަށް ނިކުންނައިރު، މެޗުގެ ފުރަތަމަ ލެގު ގެއްލިފައިވީ ނަމަވެސް، މާތް ﷲ ގެ އިރާދަފުޅާއެކު ސެމީ ފައިނަލްގެ ޖާގައެއް ކަށަވަރު ކުރާނެކަމަށް ރޮނާލްޑޯ ބުނެފިއެވެ. ރޮނާލްޑޯ މިހެން ބުނެފައިވަނީ އޭނާ ކުރި އިންސްޓްގާމް ޕޯސްޓެއްގައެވެ. މީގެ އިތުރުން، މި މެޗާ ގުޅޭ ގޮތުން ބޭއްވި ނޫސްވެރިންގެ ބައްދަލުވުމުގައި ވެސް އޭނާ މިހެން ބުނެފައިވެއެވެ.

މިރޭ (ހޯމަ ދުވަހުގެރޭ) ކުޅުމަށް ހަމަޖެހިފައިވާ މި މެޗުގެ ކުރިން ނޫސްވެރިންގެ ބައްދަލުވުމުގައި ރޮނާލްޑޯ ބުނީ "ރެމޮންޓާޑާ އިންޝާﷲ" މިހެންނެވެ. ސްޕެނިޝް ބަހުން "ރެމޮންޓާޑާ"ގެ މާނައަކީ އެނބުރި އައުމެވެ. ރޮނާލްޑޯގެ މި ވީޑިއޯ ވަނީ ސޯޝަލް މީޑިއާގައި ވެސް އާންމު ވެފައެވެ. 

ރޮނާލްޑޯ ސޯސަލް މީޑިއާގައި "އިންޝާﷲ" މި ލަފްޒު ބޭނުން ކުރުމުން، އޭނާ ވަރަށް އަވަހަށް އިސްލާމްވާނެކަމަށް ބުނެ އޭނާގެ ބައެއް ސަޕޯޓަރުން ކޮމެންޓުކޮށްފައިވެއެވެ. ނަމަވެސް ދީނާ ގުޅިގެން މިފަދަ އެއްވެސް ކަމެއް އޭނާ ހިއްސާކޮށްފައެއް ނުވެއެވެ.

ފުޓުބޯޅައިގައި "ރެމޮންޓާޑާ" މި ބަސް އެންމެ މަގުބޫލުވެފައިވަނީ ބާސެލޯނާއިން 2017 ވަނަ އަހަރުގެ ޗެމްޕިއަންސް ލީގުގެ "ރައުންޑް އޮފް 16"ގެ ދެވަނަ ލެގުގައި ޕީއެސްޖީގެ މައްޗަށް ހޯދި 6-1ގެ ނަތީޖާއަށްފަހުއެވެ. އެ ފަހަރުގެ ފުރަތަމަ ލެގުގައި ބާސެލޯނާގެ މައްޗަށް ޕީއެސްޖީ ކުރި ހޯދާފައިވަނީ 4-0 އިންނެވެ.

އޭއެފްސީ ޗެމްޕިއަންސް ލީގުގެ ކުއާޓާ ފައިނަލުގެ ފުރަތަމަ ލެގު އަލް ނަސްރަށް ގެއްލިފައިވަނީ 1-0 އިންނެވެ. އެހެންކަމުން، އަލް ނަސްރުގެ ދަނޑުގައި ކުޅޭ ދެވަނަ ލެގުގައި އެގްރިގޭޓް ސްކޯއިން ކުރި ހޯދުމަށް އަލް ނަސްރުއަށް މަޖުބޫރު ވާނެއެވެ.