ވަކި ފަރުދަކަށްވުރެ އެމްޑީޕީ އަދި މިޤައުމު މިޕާޓީގެ މެމްބަރުންނަށް މާބޮޑކަމުގައި އެމްޑީޕީގެ ޗެއާޕާސަން ފައްޔާޒް އިސްމާއީލް ވިދާޅުވެއްޖެއެވެ.

ފައްޔާޒް މިހެން ވިދާޅުވީ، އެމްޑީޕީގެ 18 ވަނަ އަހަރީ ދުވަހާއި ގުޅުވައިގެން މިއަދު ދެއްވި، ވީޑިއޯ ޚިޠާބެއްގައެވެ.

މިއަދަކީ، 26 ޖޫން 2005ގައި އެމްޑީޕީ ރަޖިސްޓްރީކުރިތާ 18 އަހަރު ފުރުނު ދުވަހެވެ.

ފައްޔާޒުގެ ޚިޠާބުގައި އެމްޑީޕީގެ އަހަރީ ދުވަހުގެ މުނާޞަބާގައި ޕާޓީގެ މެމްބަރުންނަށާއި އާއްމުންނަށް ވަނީ ދުވަހުގެ ހެޔޮއެދުމާއި ތަޙްނިޔާ ފޮނުއްވާފައެވެ.

މީގެ އިތުރުން ފާއިތުވި 18 އަހަރު އެމްޑީޕީއަށް ކުރިމަތިވި ގޮންޖެހުންތަކާއި، ޕާޓީގެ މެމްބަރުން އުފުލަންޖެހުނު ތަކުލީފުތަކާއި، އެމްޑީޕީގެ ފުރަތަމަ ވެރިކަން ގެއްލި ދިޔަ ގޮތުގެ ހަނދާންތައް ފައްޔާޒުގެ ޚިޠާބުގައި އައުކުރެއްވިއެވެ. އަދި އެމްޑީޕީގެ ތެރޭގައި މިފަހުން އުފެދުނު ސިޔާސީ ކޯޅުންގަނޑުގެ މައްޗަށްވެސް ނުސީދާ ގޮތެއްގައި ފައްޔާޒް ވާހަކަފުޅުދެއްކެވިއެވެ.

ފައްޔާޒް ވިދާޅުވީ، މިއަދުގެ ކާމިޔާބީއަށް އެމްޑީޕީ ވާޞިލްވެފައި މިވަނީ، ފަސޭހަ ދަތުރަކުން ނޫންކަމަށާއި، އެތެރޭގެ ގޮންޖެހުންތަކުން ކުރިމަތިވިި ތަކުލީފުތަކަކީ ސިޔާސީ ޕާޓީއަކުން ތަހައްމަލުކުރާނެ އެންމެ އުނދަގޫ މަރުހަލާކަމަށެވެ. ކެތްތެރިކަމާއެކު ޕާޓީގެ މަސްލަހަތު ހިފެހެއްޓި، އެމްޑީޕީގެ އަސާސްކަމުގައިވާ ޑިމޮކްރަސީގެ ހަމަތަކަށް އެންމެ ކުރިއަށް ނެރެ، ހިތި ހަގީގަތްތަކާއެކު ހިތުގެ އެއް ފަޅީގައި އެ ހިތާމަ ބަނދެގެން އެމްޑީޕީ ވަނީ އެކަން ބަރުދާސްތުކޮށްފައި ކަމުގައި ފައްޔާޒް ވިދާޅުވިއެވެ.

އެމްޑީޕީގެ 18 އަހަރުވީ ތާރީޚުގައި ސިޔާސީ ގޮތުން ވެއްޓުމާއި އެރުމުގެ އެތައް ތަޖުރިބާއެއް އެމްޑީޕީން ވަނީ ކޮށްފައެވެ. ރާއްޖޭގެ ފުރަތަމަ ގިނަ ޕާޓީތައް ބައިވެރިވި ރިޔާސީ އިންތިޚާބު ކާމިޔާބުކޮށް އެމްޑީޕީން 2008 ވަނަ އަހަރު ވެރިކަމަށް އައި ނަމަވެސް 2012 ވަނަ އަހަރު ވެރިކަން ވެއްޓިގެން ދިޔައެވެ.

އަދި އޮގަސްޓް 12، 13 އާއި، ފެބުރުއަރީ 2012ގެ 6، 7، އަދި 8 ވަނަ ދުވަހަކީ އެމްޑީޕީގެ ތާރީޚުގައި އައި ކަޅު ދުވަސްތަކެވެ. 2018 ވަނަ އަހަރުގެ ރިޔާސީ އިންތިޚާބު ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ކާމިޔާބު ކުރެއްވުމަށްފަހުގައި، އޭރު ރާއްޖެއިން ބޭރަށް އަރުވާލެވިގެން ހުންނެވި، ޕާޓީގެ ރައީސް މުޙައްމަދު ނަޝީދު އަރިހުގައި ރާއްޖެ ގެންނެވި ދުވަހު، މުޅިމާލޭގެ މަގުތަކަށް އެތައް ހާސް ރައްޔިތުންނެއް މަރުޙަބާ ދެންނެވުމަށް ނުކުތް އިރު، އެދުވަހަކީ މިހާތަނަށް ރާއްޖޭގައި ބޭއްވި އެންމެ ބޮުޑު ސިޔާސީ އެއްވުމެވެ.