ރަމަޟާން މަހަށް ތައްޔާރުވުމުގެ ގޮތުން އެޗްޑީސީން ހުޅުމާލޭގައި އެޅި ކުޑަ ވަގުތީ މިސްކިތް އިއްޔެ ހުޅުވައިފިއެވެ.

އެއްފަހަރާ 100 ވަރަކަށް މީހުންނަށް ނަމާދުކުރެވޭ ގޮތަށް އަޅާފައިވާ މި ވަގުތީ މިސްކިތް ހުޅުވާފައި ވަނީ އިއްޔެގެ ޢަސުރު ނަމާދު ވަގުތަށެވެ. އަންހެނުންނަށްވެސް ނަމާދުކުރެވޭ ގޮތަށް ހަދާފައިވާ މި މިސްކިތް ހުރީ އޭސީކޮށްފައެވެ. މީގެ އިތުރުން މިސްކިތުގައި ވުޟޫކުރުމަށް ޚާއްޞަ އިސްކުރުބަރިއެއްވެސް ވަނީ ހަދާފައެވެ.

އެޗްޑީސީން ހާމަކޮށްފައިވާ ގޮތުގައި ރޯދަ މަހަށް ހާއްސަކޮށްގެން ހިޔާ ފްލެޓްތަކުގެ ކައިރީގައި، ވަގުތީ ކުޑަ މިސްކިތެއް ހަދާފައި ވަނީ، ހިޔާ ސަރަހައްދުގައި އުޅޭ އުމުރުން ދުވަސްވީ މީހުންނާއި، ޚާއްޞަ އެހީއަށް ބޭނުންވާ މީހުންނަށް، މިސްކިތަށް ދިއުމަށް ދުރު ސަރަހައްދަށް ދާންޖެހުމުން ދިމާވާ ދަތިތަކަށް ހައްލު ހޯދައި ދިނުމުގެ ގޮތުންނެވެ. 

އިއްޔެ ހުޅުވި މި ވަގުތީ މިސްކިތަށް ދީފައިވަނީ، "މަސްޖިދުލްޝާކިރީން" މިނަމެވެ.