ގޯލްޑަން ފުޓްސަލް ޗެލެންޖު 2024ގެ ޗެމްޕިއަންކަން ހޯދި ބ. އޭދަފުށީގެ އިޝާން އިބްރާޙިމް (ސައްޓު)އަށް މުޅި މުބާރާތުގެ މޮޅު ކުޅުންތެރިޔާގެ މަގާމާއި ރާއްޖޭގެ ފުޓްސަލް ކިންގުގެ ލަގަބު ލިބިއްޖެއެވެ.

ގައުމީ ފެންވަރުގައި ފުޓުބޯޅަ ކުޅެމުން އަންނަ ސައްޓު ވަނީ މުޅި މުބާރާތުގައި ވެސް މޮޅު ކުޅުމެއް ދައްކައިފައެވެ. 2019 ވަނަ އަހަރުގެ ހިތި ހަނދާންތަކާއެކު ރޭގެ ފައިނަލަށް ނިކުތް ސައްޓުގެ ހިތުގައި ތާރީހު ބަދަލުކުރުމަށް އޮތް ހިތްވަރާއި އަޒުމު ފާހަގަވީ، މުޅި މެޗުގައި ވެސް މޮޅު ކުޅުމެއް ދައްކައި، މުޅި ޓީމުގެ ހިތްވަރު އައުކޮށްދިނުމަށް ލީޑު ނަގައިދިނުމުންވެސް މެއެވެ. އެ ގޯލަށް ފަހު އެ ޓީމަށް މެޗުގައި ލީޑު ގެއްލިފައެއް ނުވެއެވެ.

މީގެ ފަސް އަހަރު ކުރިން މި މުބާރާތުގެ ފައިނަލުގައި ތިމަރަފުށި އަތުން އޭދަފުށި ބަލިވި މެޗުގައި ސައްޓު ކުޅެފައިވުމުން، މި މުބާރާތުގެ ފައިނަލަކުން ބަލިވުމުގެ ހިތި ތަޖުރިބާ އޭނާއަށް ހުރީ އިހުސާސް ކުރެވިފައެވެ.   

މި އަހަރުގެ ގޯލްޑަން ފުޓްސަލް ޗެލެންޖުގެ ތައްޓާއެކީ، ސައްޓު މިވަނީ ފުޓުސަލްގެ އެންމެ ބޮޑު ދެ ދަށި ވެސް ކާމިޔާބުކޮށްފައެވެ. އޭނާ ވަނީ މީގެ ކުރިން ބޭންކް އޮފް މޯލްޑިވްސްއާއެކު ކްލަބް މޯލްޑިވްސް ކަޕް ވެސް ކާމިޔާބުކޮށްފައެވެ.

މުބާރާތުގެ އެންމެ މޮޅު 5 ކުޅުންތެރިންގެ ތެރޭގައި ވެސް ސައްޓު ހިމެނުނެވެ. އޭނާގެ އިތުރުން، މުބާރާތުގެ އެންމެ މޮޅު ކުލުންތެރިންގެ ތެރޭގައި ދެން ހިމެނުނީ، މިދިޔަ އަހަރުގެ ފުޓްސަލް ކިންގް، ލ. ގަމުގެ ހުސެއިން ޝަރީފް (އޮންލީ) އާއި އެ ޓީމުގެ އަލީ ޝާމިސް އާއި ކ. ގާފަރުގެ އަލީ މާއިޝް (މައްޓު) އަދި އޭދަފުށި ޓީމުގެ ހައިޝަމް ހަސަންއެވެ.

މީގެ އިތުރުން މުބާރާތުގެ އެންމެ މޮޅު ކީޕަރަކަށް ހޮވިފައިވަނީ އޭދަފުށި ޓީމުގެ އަބްދުﷲ ނާސިހުއެވެ. އަދި މުބާރާތުގައި އެންމެ ގިނަ ގޯލު ޖަހައިގެން ރަން ބޫޓު ހާސިލްކުރީ ފ. ބިލެތްދޫ ޓީމުގެ ޒިދާން ޒުހުރީއެވެ. އޭނާ ވަނީ ޖުމްލަ 18 ގޯލު ޖަހާފައެވެ.

މުބާރާތުގެ އެންމެ މޮޅު ކޯޗަކަށް ލ. ގަމުގެ ކޯޗު އިސްމާއިލް ޝަރީފް ހޮވިފައިވާއިރު، އެންމެ އުއްމީދީ ކުލުންތެރިއަކަށް ހޮވިފައިވަނީ މަތިވެރި ޓީމުގެ އަލީ އަލްސަންއެވެ.