ރާއްޖެއަށް ގިނަޕާޓީތައް އެކުލެވޭ ސިޔާސީ ނިޒާމް ތަޢާރަފްވުމަށް ފަހުގައި އައި އެންމެ އަމާން ހަމަޖެހޭ 4 އަހަރަކީ މިހިނގާ ދައުރުން މިފާއިތުވެ ދިޔ 4 އަހަރު ކަމުގައި މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ އަލްއުސްތާޛާ މާރިޔާ އަޙްމަދު ދީދީ ވިދާޅުވެއްޖެއެވެ.

އިއްޔެ ފާހަގަކުރި 131 ވަނަ ދިވެހި ސިފައިންގެ ދުވަހުގެ މުނާސަބާގައި މިނިސްޓަރ މާރިޔާ ދެއްވި ޚިޠާބުގައި ވިދާޅުވީ، ރާއްޖޭގައި މަލްޓި ޕާޓީ ނިޒާމުން 2008 ގައި ވެރިކަން ކުރަން ފަށައި މިހާތަނަށް ރާއްޖެ ދެކެފައވާ އެންމެ އަމާން ހަމަޖެހޭ ދުވަސްވަރަކީ، މިސަރުކާރުގެ މި ފާއިތުވި 4 އަހަރު ކަމަށެވެ. އަދި މިސަރުކާރުން ރާއްޖެއަށް ގެންނަމުންދާ ތަރައްޤީ އާއެކު އަސްކަރިއްޔާވެސް ޒަމާނާއި އެއްގޮތަށް ކުރިއެރުވުމަށް ރައީސުލްޖުމްހޫރިއްޔާ ޚާއްޞަ އިސްކަމެއް ދެއްވާކަމުގައިވެސް ޑިފެންސް މިނިސްޓަރ މާރިޔާގެ ޚިޠާބުގައި ފާހަގަކުރެއްވިއެވެ.

އެކަމަނާ އިތުރަށް ވިދާޅުވީ، މިދައުރުގައި ސަރުކާރަށް ހޯދުނު އެންމެ ބޮޑު ކާމިޔާބަކީވެސް މުޖުތަމަޢުގައި ހަމަޖެހުމާއި އަމާންކަން ޤާއިމްކުރެވުން ކަމަށެވެ.

"މި ފާއިތުވެ ދިޔަ ހަތަރު އަހަރުގެ ތެރޭގައި ސަރުކާރުން ހާސިލުކުރި އެންމެ ބޮޑު އެއް ކާމިޔާބީއަކީ އަޅުގަނޑުމެން މިދެކޭ ހަމަޖެހުމާއި އަމާންކަން. ގިނަ ގޮންޖެހުންތަކާއެކު ވެސް، ތަރައްގީގެ ދުވެލީގައި، އަސްކަރީ ދާއިރާ ވެސް ހިމެނިގެން، ދިވެހިރާއްޖެ މިއަދު ދެކެމުން މިދަނީ މީގެ ކުރިން ރާއްޖެ ދެކެފައި ނުވާފަދަ ހިތްހަމަޖެހޭ ދުވަސްތަކެއް." މިނިސްޓަރ މާރިޔާ ވިދާޅުވިއެވެ.

131 ވަނަ ސިފައިންގެ ދުވަސް ފާހަގަކުރުމުގެ ގޮތުން އިއްޔެއާ ރޭ ވަނީ ގިނަ ހަރަކާތްތަކެއް ހިންގާފައެވެ.

ދިވެހިރާއްޖޭގައި ސިފައިންގެ ޚިދުމަތް ފެށިފައިވަނީ 1892 އޭޕްރީލް 21 ވަނަ ދުވަހު އެވެ. އަދި ސިފައިންގެ ދުވަހުގެ ގޮތުގައި ފާހަގަ ކުރަމުން އަންނަނީ ކޮންމެ އަހަރެއްގެ ވެސް އޭޕުރީލް މަހުގެ 21 ވަނަ ދުވަހެވެ.