އެމްޓީސީސީގެ މާލީ ހާލަތު ރަނގަޅު ކުރުމަށް މަސްވެރިކަމާއި ޓޫރިޒަމް މާކެޓަށް ވަނުމަށް ނިންމާފައިވާކަމަށް އެ ކުންފުނިން ބުނެފިއެވެ. އެ ކުންފުނީގެ ފަރާތުން އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ކުންފުނީގެ ޗީފް އެގްޒެކެޓިވް އޮފިސަރ (ސީއީއޯ) ޢަބްދުﷲ ޒިޔާދު ވިދާޅުވީ، އަދުގެ ސަރުކާރުން އެމްޓީސީސީ ހިންގުމާ ހަވާލުވިއިރު ކުންފުނީގެ ހާލަތު އޮތީ ވަރަށް ދަށްކޮށް ކަމަށާއި، ހަމައެކަނި ސަރުކާރުން ހިންގާ ޕްރޮޖެކްޓްތަކުން ލިބޭ އާމްދަނީއަށް ބަރޯސާ ނުވެ، ކުންފުނީގެ ވިޔަފާރި ފުޅާކުރުމަށް އިސްކަމެއްދީގެން މަސައްކަތް ކުރަމުން އަންނަ ކަމަށެވެ.

އެމްޓީސީސީގެ 85 ޕަސެންޓް އާމްދަނީ އަކީ މިހާރުވެސް ހަމައެކަނި ސަރުކާރުގެ ޕްރޮޖެކްޓްތަކުން ލިބޭ އާމްދަނީ ކަމަށާއި، މަސްވެރިކަމާއި ޓޫރިޒަމް މާކެޓަށް ވަނުމުން ކުންފުނީގެ އާމްދަނީ އިތުރުކޮށް މާލީ ހާލަތު އިތުރުކުރުމަށް ރަނގަޅު ފުރުސަތުތައް ލިބިގެންދާނެ ކަމަށް މި ބައްދަލުވުމުގައި ޒިޔާދު ވިދާޅުވިއެވެ.

ކުންފުނީގެ ދަރަނި އަދާކުރުމަށް ފައިސާ ލިބޭނެ އިތުރު ގޮތްތައް ހޯދުމަށް ކުރެވޭނެ މަސައްކަތްތައް އެބަހުރި ކަމަށް ކުންފުނީގެ ޗީފް ފައިނޭންޝަލް އޮފިސަރ (ސީއެފްއޯ) ހުސައިން މުހައްމަދު މަނިކު އިއްޔެ ވަނީ ވިދާޅުވެފައެވެ. މިގޮތުން މަސްވެރިކަމާއި ޓޫރިޒަމް ދާއިރާއިން ކުރެވޭނެ ކަންކަން އެބަހުރި ކަމަށާއި ކުންފުނީގެ ބިޒްނަސް ޕްލޭންގައި މިކަންކަން ހިމެނޭކަމަށް ހުސައިން ވަނީ ވިދާޅުވެފައެވެ. އެގޮތުން ޓޫރިޒަމް ދާއިރާއަށް ބޭނުންވާ ފަޅުތައް ހިއްކައިގެން އިންވެސްޓަރުންނަށް ވިއްކުމުން ކުންފުންނީގެ ވިޔަފާރިއަށް ބޮޑު ފަސޭހައެއް ލިބިގެންދާނެ ކަމަށް ހުސައިން ވިދާޅުވިއެވެ.

މާލީ ހާލަތު ދަށްވުމުގެ އިތުރުން ކުންފުނީގެ ފަރާތުން ކުރިއަށް ގެންދާ ޕްރޮޖެކްޓްތަކުގެ ދުވެލި ވަރަށް ބޮޑަށް މަޑުޖެހިފައިވާކަން އިއްޔެގެ ބައްދަލުވުމުގައި ކުންފުނީގެ ސީއީއޯ ޒިޔާދު ވަނީ ވިދާޅުވެފައެވެ. އެގޮތުން އެ ކުންފުނީގެ ފަރާތުން ދެމުންގެންދާ އާރުޓީއެލް ފެރީގެ ޚިދުމަތްވެސް އުޅަނދުތައް ނެތުމުގެ ސަބަބުން ރައްޔިތުންނަށް އެންމެ ފުރިހަމަ ގޮތުގައި އެ ޚިދުމަތް ނުދެވޭކަމަށް ޒިޔާދު ފާހަގަކުރެއްވިއެވެ. ޒިޔާދު ވިދާޅުވީ ކުންފުނީގެ ވިޔަފާރި ފުޅާކުރުމަށް ކުރަމުންދާ މަސައްކަތުން، އެ ކުންފުންޏަށް ބޭނުންވާ ބޭރު ފައިސާގެ މިންވަރު އިތުރުކުރެވިގެންދާނެ ކަމަށެވެ.