އޯޓިޒަމް އެސޯސިއޭޝަންގެ ދަރިވަރުންގެ، "އާޓް އޮފް މައިންޑް" ކުރެހުމުގެ މައުރަޒު ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ހުޅުއްވައި ދެއްވައިފިއެވެ.

މި މަޢުރަޒު ހުޅުވުމުގެ ރަސްމިއްޔާތު އޮތީ މިއަދު ހެނދުނު، ހުޅުމާލޭގައި ހުންނަ މޯލްޑިވްސް އޯޓިޒަމް އެސޯސިއޭޝަންގެ އިމާރާތުގައެވެ. މައުރަޒު ހުޅުއްވައި ދެއްވުމަށްފަހު ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު ވަނީ މައުރަޒުގެ ކުރެހުންތައް ބަލައްވާލައްވައި، އޯޓިޒަމް އެސޯސިއޭޝަންގެ ދަރިވަރުންނާއި ބައްދަލުކުރައްވާފައެވެ.

މޯލްޑިވްސް އޯޓިޒަމް އެސޯސިއޭޝަނުން ހާމަކޮށްފައިވާ ގޮތުގައި މިފަހަރުގެ މައުރަޒުގައި، އެ އެސޯސިއޭޝަންގެ 170 ދަރިވަރެއްގެ އާޓް މަސައްކަތްތައް ވަނީ ދައްކާލަން ބަހައްޓާފައެވެ. އަދި މިއަހަރުގެ މައުރަޒުންވެސް ހޮވާލެވޭ ކުރެހުންތައް 2025 ވަނަ އަހަރުގެ ކަލަންޑަރު ހެދުމުގައި ބޭނުން ކުރެވޭނެ ކަމަށާއ، 2023 ވަނަ އަހަރު ބޭއްވި މައުރަޒުގެ ކުރެހުންތައް، މޯލްޑިވްސް އެއާޕޯޓްސް ކޮމްޕެނީ ލިމިޓެޑް، އެމްއޭސީއެލްއިން މިއަހަރު ނެރުނު ކަލަންޑަރުގައިވެސް ހިމަނާފައިވާކަން އެ އެސޯސިއޭޝަނުން ފާހަގަކޮށްފައިވެއެވެ.

އޯޓިޒަމާއި އެކި އެކި ޑިވެލޮޕްމަންޓަލް ޑިސްއޯޑަރތައް ހުންނަ ކުދިންގެ ހުނަރުތައް ތަރައްޤީކޮށް، އެކުދިންނަކީ މުޖުތަމައުގައި ޤަދަރުވެރި އަދި ފާހަގަކޮށްލެވޭ ހުނަރުވެރި ބަޔަކަށް ހަދައިދިނުމަށްޓަކައި އެސެންޓަރުން ކުރަމުން ގެންދާ މަސައްކަތް ތަކުގެ ތެރޭގައި ހިމެނޭ އާޓް އޮފް މައިންޑް، ކުރެހުމުގެ މަރުކަޒު ބާއްވާ މިއީ ހަވަނަ އަހަރެވެ.

އަދި މައުރަޒުގައި ދަރިވަރުން ބައިވެރިކޮށްފައިވާ ކުރެހުންތަކުގެ ތެރެއިން ހޮވާލެވޭ ކުރެހުންތައް، ޤައުމީ އަދި ބައިނަލް އަޤުވާމީ ފެންވަރުގައި ބޭއްވޭ މުބާރާތްތަކުގައި ބައިވެރި ކުރެވޭނެ ކަމުގައިވެސް އޯޓިޒަމް އެސޯސިއޭޝަނުން ވަނީ ހާމަކޮށްފައެވެ.

މިއަދާ މާދަމާވެސް މި މައުރަޒު ހުޅުވިފައި ހުންނާނެއެވެ. މިގޮތުން މާދަމާ މި މައުރަޒު ހުޅުވިފައި ހުންނާނީ، މެންދުރު 2 އިން ހަވީރު 6 އަށެވެ. މައުރަޒުގެ ކުރެހުންތައް ގަންނަން ބޭނުންވާ ފަރާތްތަކަށް، އާއްމުކޮށް އެފުރުޞަތު ހުޅުވާލެވިފައިވާ ކަމުގައި އޯޓިޒަމް އެސޯސިއޭޝަނުން ވަނީ ބުނެފައެވެ.