މިހާރު ރާއްޖެއަށް ކުރަމުންދާ ވިއްސާރައިގައި ކުރިޔަށް އޮތް ވަގުތުތަކުގައި މޫސުމް ގޯސްވާނެ ކަމަށް ލަފާކޮށް، މޫސުމާއި ބެހޭ ޤައުމީ އިދާރާއިން ވައިޓް އެލާޓް ނެރެފިއެވެ.

މޫސުމާއި ބެހޭ ޤައުމީ އިދާރާއިން ވައިޓް އެލާޓް ނެެރެފައި ވަނީ މިއަދުގެ މެންދުރުފަހު 13:15 އިން ފެށިގެން މިރޭގެ 19:00 އާ ހަމައަށެވެ. ވައިޓް އެލާޓް ނެރެފައި ވަނީ ށ. އަތޮޅުން ފެށިގެން ތ. އަތޮޅާއި ދެމެދުގައިވާ ސަރަހައްދަށެވެ.

މިގޮތުން މޫސުމް ގޯސްވެ ވައިގަދަ ވުމާއިއެކު ކަނޑުތައް ގަދަވާނެ ކަމަށާއި، އެވްރެޖްކޮށް ގަޑިއަކު 19 މޭލާއި، 24 މޭލާއި ދެމެދުގެ ބާރުމިނެއްގައި ވައިޖެހޭނެ ކަމަށް މޫސުމާއި ބެހޭ ޤައުމީ އިދާރާއިން ވަނީ ބުނެފައެވެ.

މިދުވަސްވަރަކީ، ގިނަ އަދަދެއްގެ ބަޔަކު އީދު ބަންދުގެ ޗުއްޓީއަށް އަތޮޅުތަކަށް ދަތުރުކުރާ ދުވަސްވަރުކަަަމަށް ވުމުން މޫސުމަށް ބަލައިގެން ދަތުރުކުރުމަށް މޫސުމާއި ބެހޭ ޤައުމީ އިދާރާއިންނާއި ކޯސްޓް ގާޑުން ވަނީ އިލްތިމާސްކޮށްފައެވެ.