މިހާރު މާލޭގައި ކުރިޔަށްދާ އެތުލެޓިކްސް އެސޯސިއޭޝަން ޗެމްޕިއަންޝިޕްގައި 5000 މީޓަރު ދުވުމާއި 1500 މީޓަރު ދުވުމުން ހުސެއިން ފަޒީލް ހާރޫން (ފްލެޝް) އެއްވަނަ ހޯދިއިރު، 200 މީޓަރު ދުވުމުން ހަސަން ސާއިދު އެއްވަނަ ހޯދައިފިއެވެ.

މިދިޔަ އަހަރުގެ ޗެމްޕިއަންޝިޕްގައި ވެސް 5000 މީޓަރު ދުވުމުން އެއްވަނަ ހޯދި ފަޒީލް މި އަހަރުގެ ރޭސް ކާމިޔާބުކޮށްފައިވަނީ 16 މިނިޓް، 45.90 ސިކުންތުން ރޭސް ނިންމައިގެނެވެ. ރޭހުގެ ދެވަނަ ހޯދި އައިލެންޑް ރަނާސް މޯލްޑިވްސްގެ މުހައްމަދު އިރުފާން ރޭސް ނިންމާފައިވަނީ 17 މިނިޓް، 10.52 ސިކުންތުންނެވެ. އަދި ޓްރެކް އެންޑް ފީލްޑް އެސޯސިއޭޝަންގެ އަހުމަދު ސަޖަން ޝާހިދު ރޭހުގެ ތިން ވަނަ ހޯދީ 18 މިނިޓް، 26.76 ސިކުންތުން ރޭސް ނިންމައިގެނެވެ.

މިއަދު އޮތް 1500 މީޓަރު ދުވުމުން ވެސް ފަޒީލްވަނީ އެއްވަނަ ހޯދާފައެވެ. އޭނާ މި ރޭސް ކާމިޔާބުކުރީ 4 މިނިޓު، 21.53 ސިކުންތުންނެވެ.

1500 މީޓަރު ދުވުމުގެ އަންހެން ބައިން އެއްވަނަ ހޯދާފައިވަނީ ފަސޫހާ އަހުމަދުއެވެ. އޭނާ މި ރޭސް ނިންމާފައިވަނީ 5 މިނިޓު، 22.26 ސިކުންތުންނެވެ.

މީގެ އިތުރުން، މިއަދު އޮތް 200 މީޓަރުގެ ފައިނަލް ހީޓުގައި އެއްވަނަ ހޯދީ ރާއްޖޭގެ އެންމެ ބާރު ދުވުންތެރިޔާ ހަސަން ސާއިދުއެވެ. ސާއިދު ރޭސް ނިންމާފައިވަނީ 22.05 ސިކުންތުންނެވެ. ރޭހުން ދެވަނައަށް ދިޔަ އަހުމަދު ނަޖުދާން އަބްދުﷲ 22.22 ސިކުންތުން ނިންމިއިރު، ތިން ވަނައަށް ދިޔަ އިބްރާހިމް ނާހިލް ނިޒާރު ރޭސް ނިންމާފައިވަނީ 22.69 ސިކުންތުންނެވެ.

200 މީޓަރު ދުވުމުގެ އަންހެނުންގެ ރޭހުގެ ފައިނަލް ހީޓުވެސް މިއަދު ހެނދުނު އޮތެވެ. މި ރޭސް 25.81 ސިކުންތުން ނިންމާ އެއްވަނަ ހޯދާފައިވަނީ ހައްވާ މުޒްނާ ފާއިދުއެވެ. ދެވަނަ ހޯދި ޝަބާ ސަލީމް ރޭސް ނިންމާފައިވަނީ 27.07 ސިކުންތުންނެވެ. އަދި ތިންވަނަ ހޯދި އައިޝަތު ނަ އާދު އައްސަދު ވަޖުދީ ރޭސް ނިންމީ 27.38 ސިކުންތުންނެވެ.