ޔޫއެފާ ޗެމްޕިއަންސް ލީގުގެ ގަދަ 16ގެ ދެވަނަ ލެގުގައި ރޭ ސްޕެއިންގެ ރިއާލް މެޑްރިޑާއި ޖަރުމަނުގެ އާރުބީ ލެޕްޒިގް ބައްދަލުކުރި މެޗު 1-1 އިން އެއްވަރުވި ނަމަވެސް 2-1ގެ އެގްރިގޭޓް ސްކޯ އަކުން މެޑްރިޑު ކުއާޓާ ފައިނަލަށް ދަތުރުކޮށްފިއެވެ. 

މެޑްރިޑްގެ ސެންތިއާގޯ ބާނަބޭއޯގައި ކުޅުނު މި މެޗުގައި މޮޅަށް ކުޅެފައިވަނީ ލެޕްޒިގްއެވެ. އެ ޓިމުން ޖުމްލަ 20 ހަމަލާ މެޑްރިޑްގެ ގޯލަށް ފޮނުވާލިއިރު، މެޑްރިޑަށް ފޮނުވާލެވިފައިވަނީ 12 ހަމަލާއެވެ. 

މެޗުގައި ފުރަތަމަ ލީޑު ނެގީ މެޑްރިޑުންނެވެ. މިއީ އަނިޔާގެ ސަބަބުން ފުރަތަމަ ލެގުގައި ނުކުޅެވުނު، އިންގްލެންޑުގެ 20 އަހަރުގެ ތަރި ޖޫޑް ބެލިންގްހަމަ ފަހިކޮށްދިން މޮޅު ފުރުސަތަކުން ވިނީސިއަސް ޖޫނިއަރ ކާމިޔާބުކުރި ގޯލެކެވެ. 

ނަމަވެސް އޭގެ މާގިނައިރުތަކެއް ނުވެ ލެޕްޒިގުގެ ސެންޓްރަލް ޑިފެންޑަރ، އޯބަން ވަނީ މެޗުގެ ނަތީޖާ ހަމަހަމަކޮށްދީފައެވެ.

ގަދަ-16ގެ އަނެއް މެޗުގައި މެންޗެސްޓަރ ސިޓީއާ ކޯޕަންހޭގް ބައްދަލުކުރި މެޗު ނިމުނީ 3-1 އިން ސިޓީ ކުރީގައި އޮވެގެންނެވެ. މިއާއެކު، 6-2ގެ އެގްރިގޭޓު ސްކޯއަކުން ސިޓީ ވަނީ ކުއާޓާ ފައިނަލަށް ދަތުރުކޮށްފައެވެ. މިއީ މުބާރާތުގެ ކުއާޓާ ފައިނަލަށް ޖެހިޖެހިގެން ސިޓީ ދަތުރުކުރި 7 ވަނަ ސީޒަނެވެ. 

މެޗުގެ ހުރިހާ ގޯލެއް ވެސް ފެނިގެން ގޮސްފައިވަނީ ފުރަތަމަ ހާފުގައެވެ. ސިޓީގެ ގޯލުތައް ކާމިޔާބުކޮށްދިނީ، އަކަންޖީ، އަލްވަރެޒް އަދި ހާލަންޑެވެ. ކޯޕަންހޭގަންގެ ގޯލު ކާމިޔާބުކޮށްދިނީ އެ ޓީމުގެ ނޯވޭ މިޑްފީލްޑަރު އެލީޔޫނުސީއެވެ. 

ޗެމްޕިއަންސް ލީގުގެ ގަދަ-16ގެ ބާކީ 4 މެޗު އަދި ކުޅެފައިނުވާއިރު، މި މެޗުތައް ޝެޑިއުލްކޮށްފައިވަނީ މި އަންނަ ހަފްތާއަށެވެ.