ރައީސުލްޖުމްހޫރިއްުޔާ އެމަނިކުފާނުގެ ވަޒީރުންގެ މަޖިލީހަށް އައްޔަނުކުރައްވާ ވަޒީރުންނަށް ރައްޔިތުންގެ މަޖިލީހުން ރުހުން ނުދިންނަމަވެސް، އަލުން މަޤާމުގައި ތިބެވޭނެ ކަމުގައި ޤަބޫލުކުރައްވާކަމުގައި، ބަންޑާރަ ނައިބު އަޙްމަދު އުޝާމް ވިދާޅުވެއްޖެއެވެ.

އުޝާމް ވިދާޅުވީ، ރައްޔިތުންގެ މަޖިލީހުން ރުހުން ނުދެއްވި ވަޒީރުން އަލުން މަޤާމުތަކަށް އައްޔަނުކުރައްވާފައިވާއިރު، އެކަމަކީ ޤާނޫނު އަސާސީ އާއިވެސް އަދި ޤާނޫނާއި ޚިލާފުކަމެއް ނޫންކަމަށެވެ. އަދި މަޖިލީހުން ރުހުން ނުދެއްވި ވަޒީރުންވެސް، ވަޒީރުންގެ ހައިސިއްޔަތުން މަޖިލީހަށް ހާޟިރުކޮށް ސުވާލުވެސް ކުރަމުންދާކަން އުޝާމް ފާހަގަކުރެއްވިއެވެ.

އުޝާމް ވިދާޅުވީ، 2010 ވަނަ އަހަރުވެސް އެފަދަ މައްސަލައެއް ދިމާވި ކަމަށާއި، އޭރު އެމަނިކުފާނު ހުންނެވީ ބަންޑާރަ ނައިބުގެ އޮފީހުގައި ކަމަށެވެ. އަދި އޭރު އެމްޑީޕީ ސަރުކާރުން ސްޕްރީމްކޯޓަށް ހުށައެޅި މައްސަލައިގައި، ކޯޓަށް ވަޑައިގެންނެވި ބޭފުޅުންގެ ތެރޭގައި އެމަނިކުފާނުވެސް ހިމެނިވަޑައިގަންނަވާ ކަމަށެވެ. އަދި އޭރު އެމްޑީޕީ ސަރުކާރުގެ ސްޓޭންޑަކީ، ރައްޔިތުންގެ މަޖިލީހުން ރުހުން ނުދެއްވި ވަޒީރުންގެ މަޖިލީހުގެ މެމްބަރުންނަށްވެސް މަޤާމުގައި ދެމި ތިއްބެވޭނެ ކަން ކަމަށެވެ. އަދިވެސް އެމަނިކުފާނު އެކަން ޤަބޫލު ކުރައްވަނީ އެގޮތަށް ކަމުގައި އުޝާމް ވިދާޅުވިއެވެ.

އައު ސަރުކާރުގެ ވަޒީރުންގެ މަޖިލީހަށް ރުހުން ދިނުމުގައި މަޖިލީހުން އަމަލު ކުރެއްވި ގޮތާއި ހޭދަވި މުއްދަތުވެސް ތަފާތުކަން އުޝާމް ފާހަގަކުރެއްވިއެވެ. ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ވަޒީރުންގެ މަޖިލީހަށް އައްޔަނު ކުރެއްވި މެމްބަރުންގެ ތެރެއިން، ރައްޔިތުންގެ މަޖިލީހުން ރުހުން ދީފައި ނުވަނީ، ބަންޑާރަ ނައިބު އަޙްމަދު އުޝާމަށާއި، ހައުސިންގ މިނިސްޓަރ ޑރ. ޢަލީ ހައިދަރަށާއި، އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދަށެވެ. އެ ބޭފުޅުންނަށް މަޖިލީހުން ރުހުން ނުދިނުމުން ހަމައެދުވަހު ރައީސުލްޖުމްހޫރިއްޔާ ވަނީ އެބޭފުޅުން އަލުން އެމަޤާމުތަކަށް ޢައްޔަން ކުރައްވާފައެވެ. އަދި އަލުން ރުހުން ހޯއްދެވުމަށްވެސް ވަނީ މަޖިލީހަށް ހުށައަޅުއްވާފައެވެ.