ކުރީ ސަރުކާރުން ހެދި ސެޓްލްމެންޓް ކޮމިޓީން ދިހަ ފަރާތަކަށް ބަދަލު ދިނުމަށް ނިންމާފައިވާ ނިންމި ނިންމުތައް ތަންފީޒް ނުކުރުމަށް ފިނޭންސް މިނިސްޓްރީއަށް އަންގާފައިވާ ކަމުގައި ބަންޑާރަ ނައިބު އަޙްމަދު އުޝާމް ވިދާޅުވެއްޖެއެވެ.

އުޝާމް މިހެން ވިދާޅުވީ، މިއަދު ބޭއްވި ނޫސްވެރިންގެ ބައްދަލުވުމުގައި ބަންޑާރަ ނައިބުގެ އޮފީހުން ކޮށްފައިވާ މަސައްކަތްތަކާއި ގުޅޭ ގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި އުޝާމް ވިދާޅުވީ، ކުރީ ސަރުކާރުން އުފެއްދި ސެޓްލްމެންޓް ކޮމިޓީން ބަދަލުދިނުމާއި ގުޅޭ ގޮތުން ހަދާފައިވާ އުސޫލުވެސް އުވާލައްވާފައިވާ ކަމަށެވެ. އަދި އެކޮމިޓީ 10 ފަރާތަކަށް ބަދަލު ދިނުމަށް ނިންމާފައި ވާއިރު، ބަދަލުގެ ގޮތުގައި ދޭން ކަނޑައަޅި ރަށްރަށާއި ފަޅުފަޅާއި އަދި ފައިސާ އާއިއެކު ޖުމުލަ އަގު އެއްބިލިއަން ދިވެހިރުފިޔާއަށްވުރެ މަތި ކަމަށެވެ.

ބަންޑާރަ ނައިބު ވިދާޅުވީ، ކުރިން އުފައްދާފައި އޮތް ސެޓްލްމެންޓް ކޮމިޓީގެ ނިންމުންތައް ބަލައި ދިރާސާކުރި އިރު، އޭގެ ތެރެއިން ބައެއް މައްސަލަ ތަކަކީ ކޯޓުގައި ހިނގަމުން ދިޔަ މައްސަލަތައް ކަމަށާއި އަދި އެމައްސަލަތަކަކީ އެފަރާތްތަކަށް ކާމިޔާބުވެދާނެ މައްސަލަތައް ކަމަށްވެސް ނުބެލެވޭ މައްސަލަތައް ކަމަށެވެ. އެހެން ނަމަވެސް އެފަރާތްތަކަށްވެސް ބަދަލު ދިނުމަށް ނިންމާފައިވާތީ އެނިންމުންތައް އަލުން ބަލައި، ބަންޑާރަ ނައިބުގެ އޮފީހުން ލަފައެއް ދެއްވަންދެން، ކުރީ ސަރުކާރުން ބަދަލުދޭން ނިންމާފައިވާ ފަރާތްތަކަށް ބަދަލު ދިނުމުގެ މަސައްކަތް ކުރިޔަށް ނުގެންދިޔުމަށް އެންގެވީ ކަމަށެވެ.

އެހެން ނަމަވެސް އެމައްސަލަތަކާއި ގުޅޭ ތަފްސީލްތަކެއް ބަންޑާރަ ނައިބުގެ އޮފީހުން ހާމައެއް ނުކުރައްވައެވެ.