ޔޫއެފާ ޗެމްޕިއަންސް ލީގުގެ ގަދަ-16ގެ ފުރަތަމަ ލެގުގައި ލާޒިއޯއާ ދެކޮޅަށް ބަޔާނަށް ކުރިމަތިވި ނާކާމިޔާބީ ފޫބެއްދުމަށް، ދެވަނަ ލެގުގައި ހެރީ ކޭން މުހިންމު ގޯލުތަކެއް ކާމިޔާބުކޮށް، ބެޔާން ކުއާޓާ ފައިނަލަށް ގެންގޮސްދީފިއެވެ. 

ރޯމްގައި ކުޅުނު ފުރަތަމަ ލެގުގައި އިމޯބައިލް ކާމިޔާބު ކުރި ޕެނަލްޓީއަކުން ލާޒިއޯ މޮލުވެފައިވަނީ 1-0 އިންނެވެ. މި ލީޑު ގެއްލުވާލީ މެޗުގެ 38 ވަނަ މިނެޓުގައި ކޭން ބޮލުން ކާމިޔާބުކުރި، ޔޫރަޕްގައި އޭނާ ޖެހި 50 ވަނަ ގޯލުންނެވެ. މެޗުގައި ބެޔާންގެ ލީޑު ފުޅާކޮށްދިނީ ފުރަތަމަ ހާފުގެ އިތުރު ވަގުތުގައި ތޯމަސް މުލާއެވެ. 

ބެޔާނުން ކުއާޓާ ފައިނަލް ކަށަވަރުކުރީ 66 ވަނަ މިނެޓުގައި ކޭން ކާމިޔާބުކުރި އިތުރު ގޯލަކުންނެވެ.

ޕީއެސްޖީ ކުއާޓާ ފައިނަލަށް ދަތުރުކުރީ ކީލިއަން އެމްބައްޕޭގެ ދެ ގޯލުންނެވެ. ސޮސިއެޑާޑްގެ ދަނޑުގައި ކުޅުނު މި މެޗު ޕީއެސްޖީއިން ވަނީ 2-1 އިން ކާމިޔާބުކޮށް، 4-1ގެ އެގްރިގޭޓު ސްކޯ އަކުން ކުއާޓާ ފައިނަލަށް ދަތުރުކޮށްފައެވެ. 

މި ސީޒަންގައި މިހާތަނަށް ޔޫރަޕްގެ ބޮޑު ފަސް ލީގަށް ބަލާއިރު އެންމެ ގިނަ ގޯލު ޖަހާފައިވާ އެމްބައްޕޭ ޕީއެސްޖީއަށް ލީޑު ނަގާދީފައިވަނީ 15 ވަނަ މިނެޓުގައެވެ. އޭނާގެ ދެވަނަ ގޯލު ކާމިޔާބުކޮށްފައިވަނީ މެޗުގެ 56 ވަނަ މިނެޓުގައެވެ. މި މެޗުގައި ސޮސިއެޑާޑްއަށް ކާމިޔާބު ކުރެވުނު ހަމައެކަނި ގޯލު ފެނިގެން ގޮސްފައިވަނީ މެޗުގެ 89 ވަނަ މިނެޓުގައެވެ.