މަސްތުވާތަކެތީގެ މައްސަލަތަކުގައި އުމުރަށް ޖަލަށް ލާފައިވާ 314 މީހަކު މިދިޔަ ދައުރުގެ ތެރޭގައި ވަނީ ދޫކޮށްލާފައިކަމަށް ހޯމް މިނިސްޓަރ ޢަލީ އިޙްސާން ވިދާޅުވެއްޖެއެވެ.

މިނިސްޓަރ އިހްސާން މިހެން ވިދާޅުވީ، ހޯމް މިނިސްޓްރީ އާއި އެމިނިސްޓްރީގެ ދަށުގައިވާ މުއައްސަސާތަކުން ކުރަމުންދާ މަސައްކަތްތަކާއި ގުޅޭ ގޮތުން ނޫސްވެރިންނަށް މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައެވެ.

މިނިސްޓަރ އިހްސާން ވިދާޅުވީ، މަސްތުވާތަކެތީގެ މައްސަލަތައް ހައްލު ކުރުމުގައި އެއީ ދިމާވާ ވަރަސް ބޮޑު ގޮންޖެހުމެއް ކަމަށެވެ. އަދި މަސްތުވާތަކެތީގެ މައްސަލަތަކާއި ކުށްތައް ސާބިތު ކުރުމަށް ފުލުހުންނާއި ޕްރޮސެކިއުޓަރ ޖެނެރަލް ވަރަށް ބުރަ މަސައްކަތްތަކެއް ކުރަންޖެހޭކަންވެސް މިނިސްޓަރ އިހްސާން ފާހަގަކުރެއްވިއެވެ. 

މަސްތުވާތަކެތީގެ މައްސަލަތަކުގައި އުމުރަށް ޖަލަށް ލާފައިވާ 314 މީހުން ނިމިދިޔަ 5 އަހަރުގެ ތެރޭގައި މަޢާފްދީ ދޫކޮށްލާފައިވާކަމަށް ހޯމް މިނިސްޓަރު ފާހަގަކުރެއްވި ނަމަވެސް އެކަމާއި ގުޅޭ ތަފްސީލެއް އެމަނިކުފާނު ހާމައެއް ނުކުރައްވައެވެ.

ދިވެހިރާއްޖޭގެ ހައިކޯޓުންވެސް ވަނީ މިފަދަ މައްސަލައެއް މިހަފްތާގެ ތެރޭގައި ފާހަގަކޮށްފައެވެ. މިގޮތުން މަސްތުވާތަކެތީގެ މައްސަލައެއްގައި އުމުރަށް ޖަލަށްލާފައި ހުރި މީހަކު މިނިވަން ވެފައިވާތީ އެކަމުގެ ކަންބޮޑުވުން ފަނޑިޔާރުން ފާޅުކުރައްވާފައިވެއެވެ.