ރައްޔިތުންގެ މަޖިލީހުގެ ޖަލްސާގެ ކޯރަމް ހަމަނުވެގެން މަޖިލީހުގެ ޖަލްސާ މިއަދު ކެންސަލްކޮށްފިއެވެ.

ރައްޔިތުންގެ މަޖިލީހުގެ ޖަލްސާއެއް މިއަދު ބޭއްވުމަށް މަޖިލީހުގެ އިދާރާއިން ހަމަޖައްސައި އެޖަލްސާ ފަށާގޮތަށް އޮތީ މިއަދު ހެނދުނު 9:00 ގައެވެ. އަދި ރައްޔިތުންގެ މަޖިލީހުގެ ރައީސާއި ނައިބު ރައީސް ވެސް ރަށުގައި ވަޑައިގެން ނޫޅުއްވާތީ، މަޖިލީހުގެ ޤަވާއިދުގައިވާ ގޮތުގެ މަތިން، ޖަލްސާގެ ރިޔާސަތުގައި އިށީނދެވަޑައިގެންނެވީ، ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު ޢަބުދުލ ޣަފޫރު މޫސާއެވެ.

ރައްޔިތުންގެ މަޖިލީހުގެ މިއަދުގެ ޖަލްސާ ފެށުމަށް ރިޔާސަތުގައި އިށީނދެ ވަޑައިގެންނެވުމަށްފަހުގައި، މަޖިލީހުގެ ކޯރަމް ހަމަނުވާ ކަމަށާއި، ކޯރަމް ހަމަވޭތޯ ބެލުމަށް 9:30 އާއި ހަމައަށް މަޑުކުރައްވާނެ ކަމުގައި ރިޔާސަތުން އިއުލާނު ކުރެއްވިއެވެ. އެހެން ނަމަވެސް 9:30 ވީއިރުވެސް ކޯރަމް ހަމަނުވުމުން މިއަދުގެ ޖަލްސާ ކެންސަލްކޮށް މަޖިލީހުގެ ޖަލްސާއެއް ދެން ބާއްވާނެ ދުވަހެއް ފަހުން އިއުލާނު ކުރާނެ ކަމުގައި ރިޔާސަތުން އެންގެވިއެވެ. މިއަދުގެ ރައްޔިތުންގެ މަޖިލީހުގެ ޖަލްސާއަށް ހާޟިރުވެ ވަޑައިގެންނެވީ ޖުމުލަ 11 މެމްބަރުންނެވެ.

Advertisement

ރައްޔިތުންގެ މަޖިލީހުގެ މިއަދުގެ ޖަލްސާއަށް މުހިއްމު ކަންތައްތަކެއް އެޖެންޑާކޮށްފައިވެއެވެ. އޭގެ ތެރޭގައި، ދަތުރު ރާވައި ހިންގުމުގެ ޚިދުމަތް ދިނުމާއި ބެހޭ ބިލާއި، ރިއަލްއެސްޓޭޓް ވިޔަފާރީގެ ބިލާއި، މާކަނޑުގެ ދިރުންތައް ހިމާޔަތްކުރުމާއި ގުޅޭ މުއާހަދާގައި ރާއްޖޭން ބައިވެރިވުމާއި ގުޅޭ މައްސަލަ މަޖިލީހުގެ ދާއިމީ ކޮމިޓީއަށް ފޮނުވުމާއި، ލާމަރުކަޒީ ޤާނޫނަށް ގެނައި އިސްލާހް ގެނައުމުގެ ބިލަށް ވޯޓަށް އެހުމާއި، ދިވެހިރާއްޖޭގެ ޚާރިޖީ ސިޔާސަތާއި ގުޅޭ ގޮތުން ގަލޮޅު އުތުރު ދާއިރާގެ މެމްބަރު އީވާ އަބުދުﷲ މަޖިލީހަށް ހުށައަޅުއްވާފައިވާ ޤަރާރާއި، މަޖިލީހުން ރުހުން ނުދިން ވަޒީރުންނަށް އަލުން ރުހުން ހޯދުމަށް ރައީސުލްޖުމްހޫރިއްޔާ ފޮނުއްވި މައްސަލައިގެ ޤަރާރާއި، ކާށިދޫ ދާއިރާގެ މެމްބަރު ޢަބުދުﷲ ޖާބިރު ހުށައަޅުއްވާފައިވާ، ދިވެހިރާއްޖޭގެ ބިމާއި ބެހޭ ޤާނޫނަށް އިސްލާޙް ގެނައުމުގެ ބިލްގެ މަސައްކަތް ހިމެނެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާ ކެންސަލް ކުރި އިރު، ހުސްވި ހަފްތާއިން ފެށިގެން މަޖިލީހުގެ އާއްމު ތާވަލާއި އެއްގޮތަށް ޖަލްސާތައް ނުބޭއްވުމަށް، ވަނީ ނިންމާފައެވެ. އެގޮތުން މިދިޔަ ހަފްތާގައިވެސް ބާއްވާފައި ވަނީ މަޖިލީހުގެ އެންމެ ޖަލްސާއެކެވެ.

ރައްޔިތުންގެ މަޖިލީހުގެ ޖަލްސާތައް އާއްމު އުސޫލުން ހަފްތާގެ ތިން ދުވަހު ނުބާއްވާ ގޮތަށް ހަމަޖެއްސީ، ރައްޔިތުންގެ މަޖިލީހުގައި ހިމެނޭ ޕާޓީތަކުގެ ތެރެއިން ދަ ޑިމޮކްރެޓްސް ފިޔަވައި އެހެންޕާޓީ ތަކުގެ މެމްބަރުން އެކަމަށް އެދިވަޑައިގެންނެވެ. 

ދަ ޑިމޮކްރެޓްސްގެ ރައީސް ޙަސަން ލަޠީފް ވަނީ، މަޖިލީހުގެ ޖަލްސާތައް ޤަވާއިދާއި އެއްގޮތަށް ބޭއްވުމަށް ގޮވާލައި، މަޖިލީހަށް މިދިޔަ ބުރާސްފަތި ދުވަހު މައްސަލައެއްވެސް ހުށައަޅާފައެވެ.