ވަޒީފާ އާައި ބެހޭ ޤާނޫނުގައި ކަނޑައަޅާފައިވާ މިންވަރަށް، ވުރެ އިތުރަށް، ރަމަޟާން މަހުގެ ޢިނާޔަތުގެ ގޮތުގައި ސަރުކާރުގެ ކުންފުނިތަކުން މުވައްޒަފުންނަށް ފައިސާ ނުދިނުމަށް، ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން އަންގައިފިއެވެ.

ޕީބީސީން އާދީއްތަ ދުވަހު ނެރުނު ސާކިއުލާގައި އަންގާފައި ވަނީ، ޤާނޫނު ނަމްބަރު 2/2008 ވަޒީފާ އާއި ބެހޭ ޤާނޫނުގައި ވަޒީފާ އަދާކުރާ ކޮންމެ މުސްލިމް މުވައްޒަފަކަށް ރަމަޟާން މަހުގެ ޢިނާޔަތުގެ ފައިސާ ގެ ގޮތުގައި ދިނުމަށް ކަނޑައަޅާފައިވާ، -/3000ރ އަށްވުރެ އިތުރަށް،  އަދި މަދުންވެސް ފައިސާ ނުދިނުމަށެވެ. އަދި މިހާރު އެއާއި ޚިލާފަށް ޢިނާޔަތުގެ ފައިސާ އެއްވެސް ކުންފުންޏަކުން ދީފައިވާ ނަމަ، މާރިޗު މަހުގެ މުސާރަ ދޭއިރު އެބައި ހަމަޖެއްސުމަށްވެސް ޕީބީސީން ވަނީ ކުންފުނިތަކަށް އަންގާފައެވެ.

މީގެ އިތުރުން އެއްވަޒީފާއަށްވުރެ ގިނަ ވަޒީފާ މުވައްޒަފަކު އަދާކުރާނަމަ އެމުވައްޒަފަކަށް ޢިނާޔަތު ފައިސާދޭނީ އެމުވައްޒަފެއްގެ އަސާސީ ވަޒީފާ ހަމަޖެހިފައިވާ ތަނަކުން ކަމަށާއި، އަދި ރަމަޟާން މަސްފެށޭއިރު، އޮފީހަށް ޚިދުމަތް ނުލިބޭގޮތަށް ޕޭލީވްއި ނޯޕޭލީވް، ގައި ތިބޭ ފަރާތްތަކަށްވެސް ރަމަޟާން މަހުގެ ޢިނާޔަތު ފައިސާ ނުދިނުމަށް ޕީބީސީން ވަނީ އަންގާފައެވެ.

މީގެ އިތުރުން ޕީބީސީން ބުނީ، ރަމަޟާންމަހާއި ގުޅުވައި އިތުރު ހަދިޔާތައް މުވައްޒަފުންނަށް ދޭނަމަ، އަދި އެކުންފުންޏަކީ ފައިދާވާ ކުންފުންޏެއް ނަމަ، ކުންފުނީގެ ކޭޝް ފްލޯއަށް ނުރަނގަޅު އަސަރު ނުކުރާ މިންވަރަށް އެކަންތައްތައް ހަމަޖެއްސުމަށް ސަމާލުކަން ދިނުމަށް އަންގާ ކަމަށެވެ.

ޕީބީސީން މިސަރކިއުލާ ނެރުނީ، ރަމަޟާންމަހުގެ ޢިނާޔަތުގެ ގޮތުގައި ސަރުކާރުގެ ބައެއް ކުންފުނިތަކުން އިތުރަށް ފައިސާ ދިނުމަށް ނިންމާފައިވާކަމުގެ ޚަބަރު ތަކެއް ސޯޝަލް މީޑިއާގައި ފެތުރިފައި ވަނިކޮށެވެ.