ރައްޔިތުންގެ މަޖިލީހުގެ ޖަލްސާއެއް މާދަމާ އޮންނާނެ ކަމުގައި ރައްޔިތުންގެ މަޖިލީހުގެ އިދާރާއިން ބުނެފިއެވެ.

ރައްޔިތުންގެ މަޖިލީހުގެ ޖަލްސާތައް އާއްމުކޮށް ބާއްވަމުން އަންނަ ތާވަލާއި އެއްގޮތަށް ނުބާއްވާއިރު، މިދިޔަ ހަފްތާގައިވެސް ބާއްވާފައި ވަނީ މަޖިލީހުގެ އެންމެ ޖަލްސާއެއްކެވެ. 

މާދަމާ ރައްޔިތުންގެ މަޖިލީހުގެ ޖަލްސާއެއް ބޭއްވުމަށް ނިންމާފައިވީ ނަމަވެސް މަޖިލީހުގެ ޖަލްސާގެ އެޖެންޑާ އަދި އާއްމުކޮށްފައެއް ނުވެއެވެ.

މަޖިލީހުގެ އާއްމު އުސޫލަކީ ހަފްތާގެ ތިން ދުވަހު ޖަލްސާތައް ބޭއްވުން ނަމަވެސް، މަޖިލީހުގެ ޖަލްސާތައް މިދުވަސްވަރު މަދުކޮށްލުމަށް ނިންމާފައި ވަނީ، ދަ ޑިމޮކްރެޓްސް ފިޔަވައި މަޖިލީހުގައި ހިމެނޭ ސިޔާސީ ޕާޓީތަކުގެ ޕާލަމެންޓްރީ ގުރޫޕްގެ ލީޑަރުން އެކަމަށް އެއްބަސްވެވަޑައިގެންނެވެ.

ރައްޔިތުންގެ މަޖިލީހުގެ ޖަލްސާތައް ބޭއްވުން މަދުކޮށްލީ ރައްޔިތުންގެ މަޖިލީހުގެ އިންތިޚާބު މާރިޗު 17ގައި ބޭއްވުމަށް ކުރިން ނިންމާފައި އޮއްވައެވެ. އެހެން ނަމަވެސް އާއްމު އިންތިޚާބާއި ބެހޭ ޤާނޫނަށް ގެނައި އިސްލާޙް ރައީސުލްޖުމްހޫރިއްޔާ ތަސްދީޤުކުރެއްވުމާއި އެކު، އިލެކްޝަންސް ކޮމިޝަނުން މިހާރު ވަނީ މަޖިލީހުގެ އިންތިޚާބު ބާއްވާ ތާރީޚަކީ، އޭޕްރީލް މަހުގެ 21 ވަނަ ދުވަސް ކަމުަގައި ހަމަޖައްސައި އިއުލާނުކޮށްފައެވެ.

 ދަ ޑިމޮކްރެޓްސްގެ ރައީސް އަދި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފު ވަނީ މަޖިލީހުގެ ޖަލްސާތައް ޤަވައިދުން ނުބާއްވާތީ އެކަމުގެ ކަންބޮޑުވުންފާޅުކުރައްވާފައެވެ. އަދި އެކަމާއި ގުޅިގެން މަޖިލީހަށް ޙަސަން ލަޠީފް ވަނީ ބުރާސްފަތި ދުވަހު މައްސަލައެއްވެސް ހުށައަޅުއްވާފައެވެ.