ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު އަތޮޅުތެރެއަށް ކުރައްވާ ދަތުރުފުޅުގެ ތެރެއިން ކެނދިކުޅުދޫއަށް ކުރެއްވި ދަތުރުފުޅަކީ ކެމްޕޭން ދަތުރުފުޅެއްކަމަށް ބުނެ، ކެނދިކުޅުދޫ ކައުންސިލުން ނެރުނު ބަޔާން ބާޠިލް ކުރުމަށް އެލްޖީއޭއިން އެންގި އެންގުމާއި އެއްގޮތަށް އަމަލުނުކުރުމަށް ކެނދިކުޅުދޫ ކައުންސިލުން ނިންމައިފިއެވެ.

ކެނދިކުޅުދޫ ކައުންސިލްގެ ނައިބު ރައީސް ހަސަން މުޙައްމަދު "ނޫން"އަށް މައުލޫމާތު ދެއްވަމުން ވިދާޅުވީ، އެލްޖީއޭއިން އެންގި އެންގުމަށް ތަބާވެ، ނޫސްބަޔާން ބާޠިލް ނުކުރުމަށް ކެނދިކުޅުދޫ ކައުންސިލުން ނިންމީ، އެ އެންގުމަކީ ޤާނޫނީ ގޮތުން އެލްޖީއޭއަށް އެންގޭނެ އެންގުމެއް ކަމަށް ނޫންކަމަށް، އެކައުންސިލަށް ޤާނޫނީ ލަފާ ދެއްވާ ބޭފުޅުން ވިދާޅުވެފައި ވާތީ ކަމަށެވެ.

އެލްޖީއޭއިން ކެނދިކުޅުދޫ ކައުންސިލަށް އަންގާފައި ވަނީ، މިއަދުގެ މެންދުރު 14:00 ގެ ކުރިން އެނޫސް ބަޔާން ބާޠިލް ކުރުމަށެވެ. އެހެން ނަމަވެސް އެލްޖީއޭގެ އެންގުމާއި އެއްގޮތަށް، ކެނދިކުޅުދޫ ކައުންސިލުން ޢަމަލު ނުކުރުމުން އެކަމާއި މެދު އަޅާނެ ފިޔަވަޅެއް އަދި އެލްޖީއޭއިން ހާމަަކޮށްފައެއް ނުވެއެވެ.

ކެނދިކުޅުދޫ ކައުންސިލުން ވަނީ ކައުންސިލްގެ ނިންމުމަށް ފަހުގައި، އަނގަމަތީ ޓޭޕް އަޅައިގެން ތިބޭ ފޮޓޯއެއް ނަގާފައެވެ. އެފޮޓޯއާއި ގުޅޭ ގޮތުން ޙަސަން މުހައްމަދު ވިދާޅުވީ، އެއީ އެލްޖީއޭއިން އެންގި އެންގުމުގައި ކައުންސިލްތަކަށް، ޚިޔާލުފާޅުކުރުމާއި، ކަންކަމާއި މެދު ބަސްބުނެ ނޫސްބަޔާންތައް ނުނެރެވޭނެކަމަށް ބުނެފައިވާތީ އެކަމަށް ދެކޮޅު ހެދުމުގެ ގޮތުން ނަގާފައިވާ ރަމްޒީ ފޮޓޯއެއް ކަމަށެވެ.

ކެނދިކުޅުދޫ ކައުންސިލުން ނެރުނު ބަޔާން ބާޠިލްކުރުމަށް އެލްޖީއޭއިން އެނގުމާއި ގުޅިގެން، އެންމެ ބޮޑު އިދިކޮޅު ޕާޓީ އެމްޑީޕީންވެސް ވަނީ އެކަން ކުއްވެރިކޮށް ބަޔާނެއް ނެރެފައެވެ. އެމްޑީޕީގެ ބަޔާނުގައި، ބުނެފައި ވަނީ، ކައުންސިލްތަކުން ނެރޭ ބަޔާންތައް އަނބުރާ ގެންދިއުމަށް އެންގުމާއި ކައުންސިލްތަކުން ނިންމާ ނިންމުންތަކާމެދު ބިރުދެއްކުމުގެ ނިޔަތުގައި ލޯކަލް ގަވަންމަންޓް އޮތޯރިޓީ މެދުވެރިކޮށް ސުވާލުކުރުމަކީ އަލުން އަނެއްކާވެސް 2013 ގައި އުފެދުނު ޕީޕީއެމްގެ ވެރިކަމުގައި ކައުންސިލްތަކަށް ރައްޔިތުންގެ އިންތިހާބުކޮށްފައިވާ ކައުންސިލަރުންގެ މުސާރަ އުނިކޮށް, ސަސްޕެންޑްކޮށް ކައުންސިލްތަކުގެ ބާރު އަނެއްކާވެސް ކަނޑުވާލުމުގެ ފިކުރު ރައީސް ޑރ. މުއިއްޒުގެ ސަރުކާރުން އެ ސިޔާސަތު އިއާދަކުރުމަށް ކުރަމުންދާ ކަމެއްކަމަށް އެމްޑީޕީން ދެކޭ ކަމަށެވެ.