ސްޕެނިޝް ލީގުގައި ރޭ މަޔޯކާ އިން ޖިރޯނާގެ މައްޗަށް 1-0 އިން ކުރި ހޯދުމުން، ރެއާލް މެޑްރިޑާ ޕޮއިންޓުގެ ގޮތުން ފަރަގު ކުޑަ ކުރުމަށް ލިބުނު ފުރުސަތު ބޭކާރުވެ، ޖިރޯނާ ލީގު ރޭހުން ސޮއްސާލައިފިއެވެ.

ހޮނިހިރު ދުވަހު ރެއާލް މެޑްރިޑާއި ވެލެންސިއާ ބައްދަލުކުރި މެޗު 2-2 އިން އެއްވަރުވުމުން، ޖިރޯނާއިން ނިކުތީ ފަރަގު ކުޑަކުރުމުގެ އުއްމީދާއެކުއެވެ. އަނެއްކޮޅުން، ތިން ވަނައިގައި އޮތް ބާސެލޯނާއާއި އެތުލެޓިކް ކްލަބް ބައްދަލުކުރި މެޗު 0-0 އިން އެއްވަރުވުމުން، ޖިރޯނާއަށް މަޔޯކާ ބަލި ކުރެވުނު ނަމަ ބާސެލޯނާއާ އޮތް ފަރަގު 4 ޕޮއިންޓަށް ބޮޑު ކުރެވުނީހެވެ.

ލީގުގެ އެއްވަނައިގައި އޮތް މެޑްރިޑަށް 27 މެޗުން 66 ޕޮއިންޓު ލިބިފައިވާއިރު، ޖިރޯނާއަސް ލިބިފައިވަނީ  59 ޕޮއިންޓެވެ. އަދި ބާސެލޯނާ ތިން ވަނައިގައި އޮތީ 58 ޕޮއިންޓާއެކުގައެވެ.

ޖިރޯނާއާ މަޔޯކާ ބައްދަލުކުރި މެޗުގައި ފުރަތަމަ ހަމަލާ އުފެއްދީ ޖިރޯނާއިންނެވެ. ޖިރޯނާގެ މިގުއެލް ގުތިއަރޭޒްގެ ހުރަހަކުން އިވާން މާޓިނޭޒް ބޮލުން ފޮނުވާލި އެ ހަމަލާ މަޔޯކާގެ ކީޕަރު ވަނީ ދިފާއުކޮށްފައެވެ.

މަޔޯކާގެ ގޯލު ކާމިޔާބުކޮށްފައިވަނީ މެޗުގެ 33 ވަނަ މިނެޓުގައެވެ. އެއީ އެ ޓީމަށް ލިބުނު ކޯނަރަކުން ފަހިވި ފުރުސަތަކުން ކޮޕެޓް ކާމިޔާބުކުރި ގޯލެކެވެ.

އޭގެ މާ ގިނައިރުތަކެއް ނުވެ، ޖިރޯނާއަށް ނަތީޖާ ހަމަހަމަ ކުރާނެ ރަގަޅު ފުރުސަތެއް ލިބުނެވެ. ނަމަވެސް ސެވިއޯގެ ހަމަލާ ދިޔައީ ހުރަސް ދަނޑި މަތިން ބޭރަށެވެ.

ދެވަނަ ހާފުގައި ގިނައިރު ބޯޅަ ހިފަހައްޓާ، ޖިރޯނާއިން ވަނީ ނުރައްކާތެރި ހަމަލާތަކެއް ވެސް އުފައްދާފައެވެ. މެޗުގެ ފަހުމިނެޓުކޮޅުގައި ނަތީޖާ ހަމަހަމަ ކުރުމަށް ލިބުނު އެންމެ ރަގަޅު ފުރުސަތު އަމާޒުވީ ގޯލު ދަނޑިއާއެވެ. އެއާއެކު ޖިރޯނާއިން ލީގުގައި 4 ވަނަ ބައްޔާއި ކުރިމަތިލާން ޖެހުނެވެ.