މިދިޔަ މަހު ޕާކިސްތާނުގައި ބޭއްވި، މައްސަލަ ބޮޑު ޕާލަމެންޓު އިންތިހާބަށްފަހު އަނެއްކާވެސް ޝެހެބާޒް ޝަރީފް އެ ގައުމުގެ ބޮޑު ވަޒީރުކަމަށް ގައުމީ މަޖިލީހުން ހޮވައިފިއެވެ.

ނިމިދިޔަ ފެބުރުވަރީ މަހުގެ 8 ވަނަ ދުވަހު ޕާކިސްތާނުގައި ބޭއްވި ޕާލަމެންޓު އިންތިހާބުގައި ވޯޓު އޮޅުވާލާފައިވާކަމަށް ގިނަ ބަޔަކު ދަނީ ތުހުމަތު ކުރަމުންނެވެ. މި އިންތިހާބުގެ ނަތީޖާ ވެސް އިއުލާންކޮށްފައިވަނީ ދިގު ދައްމާލުމަށްފަހުއެވެ. 

އާދީއްތަ ދުވަހު ޕާކިސްތާނުގެ ގައުމީ މަޖިލީހުގައި ބޮޑު ވަޒީރަކު އައްޔަން ކުރުމަށް ނެގި ވޯޓު ޝެހެބާޒް ޝަރީފް ކާމިޔާބުކޮށްފައިވަނީ 201 ވޯޓުންނެވެ. އޭނާއާއި އެންމެ ކައިރިން ވާދަކުރި އޮމަރު އައްޔޫބު ޚާނަށް ލިބުނީ 92 ވޯޓެވެ. ޖުމްލަ 336 މެމްބަރުން ތިބޭ މި މަޖިލީހުގައި ޕްރައިމް މިނިސްޓަރަކު އައްޔަން ކުރުމަށް މަދުވެގެން 169 ވޯޓު ބޭނުންވެއެވެ.

ގައުމީ މަޖިލިސް އިންތިހާބުގައި އައްޔޫބު ޚާނަށް ސަޕޯޓުކޮށްފައިވަނީ ސުންނީ އިއްތިހާދު ކައުންސިލް (އެސްއައިސީ) އިންނެވެ. އެސްއައިސީއަކީ، ޕާކިސްތާނުގެ ކުރީގެ ބޮޑު ވަޒީރު އިމްރާން ޚާންގެ ޕާކިސްތާން ޓަހްރީކް އިންސާފް (ޕީޓީއައި) ޕާޓީއަށް ނިސްބަތްވާ ސިޔާސީ ގްރޫޕްގެ ގާނޫނު ހަދާ މަޖިލީހުގެ މެމްބަރުން ހިމެނޭ ކައުންސިލެކެވެ. 

އުމުރުން 72 އަހަރުގެ ޝެހެބާޒް ޝަރީފް އަކީ ޕާކިސްތާނުގެ ބޮޑު ވަޒީރުގެ މަގާމު މިދިޔަ ދައުރުގައި ވެސް ފުރުއްވި ފަރާތެވެ. އޭނާއަކީ ދިން ދައުރު ޕާކިސްތާނުގެ ބޮޑު ވަޒީރުކަން ކުރެއްވި ނަވާޒް ޝަރީފްގެ ކޮއްކޮއެވެ.