ލޮލަށް ނުފެންނަ މީހުންނަށް ވޯޓުލުމުގެ ހޯދައިދިނުމަށް ޤާނޫނަށް ގެނައި އިސްލާޙް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ތަސްދީޤު ކުރައްވައިފިއެވެ.

މިގޮތުން ޤާނޫނު ނަންބަރު 11/2008: (އިންތިޚާބުތަކާބެހޭ ޢާންމު ޤާނޫނު)އަށް 3 ވަނަ އިޞްލާޙް ގެނައުމުގެ ބިލް ރައީސުލްޖުމްހޫރިއްޔާ ތަސްދީޤު ކުރައްވާފައި ވަނީ، އިއްޔެއެވެ.

މިބިލަކީ، ޖޫން 19 ވަނަ ދުވަހު ބޭއްވި ރައްޔިތުންގެ މަޖިލީހުގެ 2023 ވަނަ އަހަރުގެ ދެވަނަ ދައުރުގެ 13 ވަނަ ޖަލްސާއިން ފާސްކޮށްފައިވާ ބިލެކެވެ.

މިޤާނޫނަށް ގެނެވުނު މައިގަނޑު އިސްލާޙަކީ، ވޯޓުކަރުދާހުގައި އަމިއްލައަށް ފާހަގަޖެހުމަށް ޖިސްމާނީގޮތުން ނުކުޅެދިގެންވާ މީހުންގެ ތެރެއިން، ފެނުމުގެ ނުކުޅެދުންތެރިކަން ހުންނަ މީހުން، އެހެން މީހެއްގެ އެހީތެރިކަމާއި ނުލައި، ވޯޓުކަރުދާހުގައި އަމިއްލައަށް ފާހަގަޖެހުމަށް އެދޭނަމަ، އެކަން ކުރާނެ ގޮތް ބަޔާންކުރުމެވެ.

މިޤާނޫނުގައި ބަޔާންކޮށްފައިވާ ގޮތުން ވޯޓުލުމުގެ ހައްޤު ލިބިފައިވާ މީހުންގެ ތެރެއިން، ޖިސްމާނީ ނުކުޅެދުންތެރިކަން ހުންނަ މީހުންގެ ތެރެއިން ލޮލުގެ ފެނުމުން މަހްރޫމްވެފައިވާ މީހަކު އަމިއްލައަށް ވޯޓު ކަރުދާހުގައި ފާހަގަޖެހުމަށް ބޭނުންވާނަމަ، އެމީހަކަށް ފާހަގަޖެހުމަށްދޭ ވޯޓު ކަރުދާސް އޮންނަން ވާނީ އެކަމަށް ޚާއްސަކޮށްފައިވާ ޓެމްޕްލޭޓެއްގެ ތެރެއަށް ލާފައެވެ. އަދި އެޓެމްޕްލޭޏް ހުންނަންވާނެ ގޮތްވެސް ޤާނޫނަށް ގެނައި އެ އިސްލާޙްގައި ބަޔާންކޮށްަފައިވެއެވެ.

   ދިވެހި ސަރުކާރުގެ ގެޒެޓުގައި އިއްޔެ ޝާއިޢު ކުރައްވާފައިވާ މިޤާނޫނަކީ، ޤާނޫނު ނަންބަރު: 3/2023 (ޤާނޫނު ނަންބަރު 11/2008، އިންތިޚާބުތަކާބެހޭ ޢާންމު ޤާނޫން)އަށް 3 ވަނަ އިޞްލާޙު ގެނައުމުގެ ޤާނޫނެވެ. އިއްޔެ މިޤާނޫނު ރައީސް ތަސްދީޤުކުރައްވައި ގެޒެޓްކުރެއްވުމާއި އެކު، އިއްޔެއިން ފެށިގެން ދެން އޮންނަ ކޮންމެ އިންތިޚާބެއްގައިވެސް މިޤާނޫނާއި އެއްގޮތަށް ޢަމަލު ކުރަންޖެހޭނެއެވެ.