މިއަހަރު ނިމުމުގެ ކުރިން ސޮވެރިންގ ޑިވެލޮޕްމެންޓަށް ފަންޑަށް ސަތޭކަ މިލިޔަން ރުފިޔާ ޖަމާކުރައްވާނެ ކަމުގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިހާރު އަތޮޅުތަކަށް ކުރައްވަމުން ގެންދަވާ ދަތުރުފުޅުގެ ތެރެއިން، ރ. އަލިފުއްޓަށް ކުރެއްވި ޒިޔާރަތުގައި އެރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވިދާޅުވީ، މިއަންނަ އަހަރަކީ ދައުލަތުން ބޭރުގެ ގިނަ ދަރަނިތަކެއް ދައްކަން ހުރި އަހަރެއް ކަމަށެވެ. 

ރައީސުލްޖުމްހޫރިއްޔާ ވިދާޅުވީ، ސޮވްރިންގ ޑިވެލޮޕްމަންޓް  ފަންޑަށް ޑޮލަރު ޖަމާކުރުމުގެ މަސައްކަތްވެސް މިސަރުކާރުން މިހާރު ކުރަމުންދާ ކަމަށާއި، މިހާތަނަށް ތިރީހަކަށް މިލިއަން ޑޮލަރު ޖަމާކުރެވިފައިވާ ކަމަށެވެ.

ރައީސުލްޖުމްހޫރިއްޔާގެ ވާހަކަފުޅުގައި އިތުރަށް ވިދާޅުވީ،  ޓެކްސް ބޭސް ފުޅާކޮށް، ޓެކްސް ނިޒާމުގެ ތެރެއިން އާމްދަނީ އިތުރުކުރެވޭނެ ގޮތްތަކަށް މަސައްކަތް ކުރައްވަމުން ގެންދަވާ ކަމަށެވެ. އެހެން ނަމަވެސް އިތުރު އާ ޓެކްސްްއެއް ތަޢާރަފް ނުކުރައްވާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

ސޮވެރިންގ ޑިވެލޮޕްމަންޓް ފަންޑަކީ، ރާއްޖެއިން އަދާކުރަންޖެހޭ ދަރަނިތައް އަދާކުރުމަށް ބޭނުން ކުރުމަށް ޤާއިމްކުރެއްވި ފަންޑެކެވެ. އެހެން ނަމަވެސް އެފަންޑާއި ގުޅޭ ގޮތުން، މިހާރުގެ ސަރުކާރުން ދައްކަމުންދާ ބައެއް ވާހަކަތައް ކުރީ ސަރުކާރުގެ އިސްބޭފުޅުން އަންނަނީ ދޮގުކުރަމުންނެވެ.