ސްޕެނިޝް ލީގުގައި ރެއާލް މެޑްރިޑާއި ވެލެންސިއާ ބައްދަލުކުރި ފޯރިގަދަ މެޗުގައި، މެޑްރިޑް މޮޅުކޮށްދިނުމަށް 99 ވަނަ މިނެޓުގައި ޖޫޑް ބެލިންގްހަމް ކާމިޔާބުކުރި ގޯލު ބަލައިނުގަތުމުން، އޭނާއާއި މެޑްރިޑުގެ އެހެން ކުޅުންތެރިން ރެފްރީއާއި ހިންހަމަނުޖެހި، ރެފްރީގެ ނިންމުމާ ވަރަށް ބޮޑަށް ފާޑުކިއެވެ. ނަތީޖާއަކަށްވީ ބެލިންގްހަމްއަށް މެޗު ނިމުނުފަހުން ރަތްކާޑެއް ދެއްކުމެވެ.

މެޗު ފަށައިގެން 30 މިނެޓު ކުޅެވުނުއިރު ވެލެންސިއާ އިން 2 ގޯލުގެ ލީޑެއްނެގިއެވެ. މިއީ މެޑްރިޑުގެ ޑިފެންސްލައިނަށް ހެދުނު ގޯސްތަކެއްގައި ވެލެންސިއާގެ ސްޕެއިން ފޯވާޑް ހޫގޯ ޑުރޯ އަދި ޔުކްރެއިންގެ ފޯވާޑް ރޯމަން ޔަރަމްޗުކް ކާމިޔާބުކުރި ގޯލުތަކުންނެވެ.

މެޑްރިޑުން މެޗުގެ ނަތީޖާ ހަމަހަމަކުރީ ވިނީސިއަސް ޖޫނިއަރގެ 2 ގޯލުންނެވެ. އަދި 2-2 އިން ދެ ޓީމު ހަމަހަމަކޮށް އޮވެ މެޗު ނިމެން ދަނިކޮށް، އިތުރު ވަގުތުގެ 9 ވަނަ މިނެޓުގައި މޮޑްރިޗް ނެގި ކޯނަރެއް ވެލެންސިއާ ކުޅުންތެރިއަކު ބޮލުން ސާފުކޮށްލި ބޯޅަ އެ ޓީމުގެ ޕެނަލްޓީ އޭރިއާ ތެރެއަށް ވެއްޓުމުން، އެ ބޯޅަ އިތުރު ހަމަލާއަކަށް ބަދަލު ކުރުމަށް މެޑުއިޑުގެ ކުޅުންތެރިން މަސައްކަތްކުރިއެވެ. އެގޮތުން ޕެނަލްޓީ އޭރިއާގެ ކަނާތްފަރާތުގެ ރޮނގު ކައިރިން ގޯލު ކުރިމައްޗަށް ބޯޅަ ހުރަސްކޮށްލި ވަގުތު މެޗު ނިންމާލުމަށް ރެފްރީ ކަށިގަނޑު ފުމެލިއެވެ. އެ ހުރަސް ބެލިންގްހަމް ވަނީ ބޮލުން ގޯލަށް ފޮނުވާލާފައެވެ. ނަމަވެސް ރެފްރީ ނިންމީ އެއީ މެޗު ނިންމާލި ފަހުން ބެލިންގްހަމް ކާމިޔާބުކުރި ގޯލެއް ކަމަށެވެ.

މެޑްރިޑުގެ ކުޅުންތެރިން ހިންހަމަ ނުޖެހުނީ އެ ޓީމުން ވެލެންސިއާގެ ގޯލު ކައިރީގައި ގޯލު ޖަހާނެ ފުރުސަތެއް ތަނަވަސް ކުރަމުން ދަނިކޮށް ރެފްރީ މެޗު ނިންމާލުމުންނެވެ. ރެފްރީގެ މި ނިންމުން ބަލައިގަތުމަށް އެންމެ އުނދަގޫވި ކުޅުންތެރިއަކީ ގޯލު ކާމިޔާބުކުރި ބެލިންގްހަމްއެވެ. އެގޮތުން އޭނާއަށް ރެފްރީ ރަތްކާޑު ދެއްކީ ރެފްރީއާ މުއާމަލާތްކުރި ގޮތުންކަމަށް ބުނެފައިވެއެވެ.

މި ރަތްކާޑާ ގުޅިގެން ބެލިންގްހަމް ސަސްޕެންޑު ވެގެންދާނެ މެޗުގެ އަދަދު އެނގޭނީ، އެ ކާޑަށް އެޕީލް ކުރުމަށްފަހު އެ މައްސަލަ ނިމޭ ގޮތަކުންނެވެ.