އޭޑީކޭ ހޮސްޕިޓަލް ކުރިމަތީގައި ހުރި ބްލޮކުގެ އިމާރާތެއްގައި ރޯވެ އަލިފާނުގެ ހާދިސާއެއް ހިނގައިފިއެވެ.

އަލިފާން ރޯވެފައިވަނީ މަޖީދީމަގުގެ ފަސޭހަ ހޮޓާ ކުރިމައްޗަށް ހުންނަ ގޯޅި ތެރޭގައި ހުރި ހ. ސަންގްރޭޒް ކިޔާ ގޭގެ ފުރަތަމަ ފަންގިފިލާގައެވެ.  މި ހާދިސާ ހިނގިއިރު އެ ގޭގައި އެއްވެސް މީހަކު ނެތެވެ. އެހެންކަމުން މި ހާދިސާގައި އެއްވެސް މީހަކަށް އަނިޔާވެފައެއް ނުވެއެވެ.

ހާދިސާގެ މައުލޫމާތު 6:07 ގައި ލިބުމާއެކު އަލިފާން ނިއްވުމުގެ މަސައްކަތުގައި ސިފައިން ވަނީ ހަރަކާތްތެރިވެފައެވެ.  އަދި ސަލާމަތީ ފިޔަވަޅެއްގެ ގޮތުން، އެ ސަރަހައްދުގެ ބައެއް ގެތަކުން އެވަގުތު ވަނީ މީހުން ނެރެ ހުސްކޮށްފައެވެ.

މި އަލިފާންގަނޑު 6:23 ހާއިރު ކޮންޓްރޯލް ކުރެވިފައިވާކަމަށް އެމްއެންޑީއެފުން ވަނީ ބުނެފައެވެ.