މޯލްޑިވިއަން އޭވިއޭޝަން އެކަޑަމީން ޕައިލެޓް ޓްރޭނިންގ ފުރިހަމަކުރާ ދަރިވަރުން ފެންވަރު، ޔޫރަޕްގެ އޭވިއޭޝަން އެކަޑަމީ ތަކުން ތަމްރީންވާ ދަރިވަރުންނާއި ފެންވަރުގެ ގޮތުން އެއްހަމަ ވާނެ ކަމުގައި، މޯލްޑިވިއަން އޭވިއޭޝަން އެކަޑަމީގެ ހެޑް އޮފް ފްލައިޓް ޓެކްނިކަލް، ފްލައިޓް އޮޕަރޭޝަންސް ޒައިދު އައްސަދު ވިދާޅުވެއްޖެއެވެ.

މޯލްޑިވިއަން އޭވިއޭޝަން އެކަޑަމީން އޭޕްރީލް އިންޓޭކްގައި ފަށާ ޕައިލެޓް ޓްރޭނިންގކޯހާއި ގުޅޭ ގޮތުން، "ނޫން"އަށް މައުލޫމާތު ދެއްވަމުން، ޒައިދު ވިދާޅުވީ، ރާއްޖޭގެ ސިވިލްއޭވިއޭޝަންގެ ޤާނޫނާއި ޤަވާއިދުތަކަކީ، ޔޫރަޕިއަންގެ މަދަނީ ވައިގެ ދަތުރުފަތުރު ކުރުމުގެ ޤާނޫނާއި ޤަވާއިދުތަކާއި އެއްގޮތަށް ލިޔެފައިވާ ޤާނޫނާއި ޤަވާއިދުތަކެއް ކަމަށެވެ. އެހެންކަމުން މޯލްޑިވިއަން އޭވިއޭޝަން އެކަޑަމީގެ ޕްރޮފްރާމްތައްވެސް ހެދިފައި ވަނީ އެމިންގަނޑުތަކަށް ކަމަށް ވުމާއިއެކު، މޯލްޑިވިއަން އޭވިއޭޝަން އެކަޑަމީން ނިމޭ ދަރިވަރަކުވެސް އެތަމްރީން ނިންމާލަނީ، ޔޫރަޕްގައި ހުންނަ ފްލައިން ސްކޫލެއްގެ ދަރިވަރަކުވެސް ނިންމާ ފެންވަރުގައި ކަމަށް ޒައިދު ވިދާޅުވިއެވެ.

ޒައިދު ވިދާޅުވީ، ޔޫރަޕްގައިވެސް ކިޔަވައިދޭ ގޮތާއި، ބޭނުންކުރާ މަތިންދާ ބޯޓުތައް އެކި ސްކޫލުތަކުގައި ތަފާތު ވާނެކަމަށެވެ. އަދި މިސަރައްހަދުގެ އެންމެ ބޮޑު އޭވިއޭޝަން އިންޑަސްޓްރީއަކީ އިންޑިއާ ކަމަށްވާއިރު، އަދި އިންޑިއާއިންވެސް ޔޫރަޕްގެ ސްޓޭންޑަރޑްތަކާއި އެއް ފެންވަރަށް ނުދާކަން ޒައިދު ފާހަގަކުރެއްވިއެވެ.

ޒައިދު ވިދާޅުވީ، މޯލްޑިވިއަން އޭވިއޭޝަން އެކަޑަމީގައި، ޕައިލެޓް ތަމްރީން ފުރިހަމަކުރާ ދަރިވަރުންނަށް، އިންސްޓްރަކްޓަރުންގެ ގޮތުގައި ހަރަކާތްތެރިވާނީ ބޭރުގެ ޢިލްމީ އަދި ފަންނީ ތަޖުރިބާ ހުރި އިންސްޓްރަކްޓަރުން ކަމަށެވެ.

މީގެ އިތުރުން މޯލްޑިވިއަން އޭވިއޭޝަން އެކަޑަމީއަށް އެހެން ފްލައިން ސްކޫލުތަކާއި ހުރި ތަފާތަކީ، އެ އެކަޑަމީއަކީ، މިހާރުވެސް އައިލެންޑް އޭވިއޭޝަންގެ ދަށުގައި އޮތް އެކަޑަމީއެއް ކަމުގައިވުން ކަމުގައި ޒައިދު ވިދާޅުވިއެވެ. މިގޮތުން އައިލެންޑް އޭވިއޭޝަންގެ މޯލްޑިވިއަންއިން، އެއާބަސް، ޑޭޝް 8 އަދި އޭޓީއާރާއި ޓްވިން އޮޓާ ސީޕްލޭންތައް ދުއްވާއިރު، ދުނިޔޭގެ ނިސްބަތުން ތަޖުރިބާއަށް ބަލާއިރުވެސް މޯލްޑިވިއަން އަކީ ކުޑަ އެއާލައިނެއް ނޫންކަން ޒަައިދު ފާހަގަ ކުރެއްވިއެވެ.

އަންނަ އޭޕްރީލްމަހު 28 ކުދިންނާއި އެކު ޕައިލެޓް ޓްރޭނިންގެ 4 ވަނަ ބެޗު ފެށުމަށް ތައްޔާރުވާއިރު، ކޯހުގައި ބައިވެރިވުމުގެ ސުންގަޑިއަކީ މިމާރިޗު މަހުގެ 31 ވަނަ ދުވަހެވެ.