މޯލްޑިވިއަން އޭވިއޭޝަން އެކަޑަމީގެ އޭޕްރީލް އިންޓޭކްގެ ކޯސްތަކަށް ހުޅުވާލައިފިއެވެ.

ނޫންޑޮޓްއެމްވީއަށް ދެއްވި ބަސްދީ ގަތުުމުގައި، އައިލެންޑް އޭވިއޭޝަންގެ، ޗީފް އިންޖިނިއަރ އިން ޖެނެރަލް އޭވިއޭޝަން، އަޙްމަދު ސުމާން ރަފީޤު ވިދާޅުވީ، މިއިންޓޭކްގައި ކުރިޔަށް ގެންދާނީ، މޯލްޑިވްސް އޭވިއޭޝަން އެކަޑަމީން ހިންގާ ޕައިލެޓުން ތަމްރީން ކުރުމުގެ ކޯސްކަމަށެވެ. މިކޯހުގެ މުއްދަތަކީ އެއް އަހަރު ކަމަށާއި، އޭގެ ތެރެއިން ފުރަތަމަ 6 މަސްދުވަހު ދަރިވަރުން އުޅޭނީ ގްްރައުންޑް ޓްރޭނިންގގައި ކަމަށާއި، ގްރައުންޑް ޓްރޭނިންގައި 36 މޮޑިއުލެއް ކިޔަވައިދޭނެ ކަމުގައި އޭނާ ވިދާޅުވިއެވެ. އަދި ފުރަތަމަ ހަމަސްދުވަހުގެ ތަމްރީންތަކާއި ތިޔަރީޓެސްޓްތަކުން ފާސްވުމަށް ފަހުގައި ފަހު 6 މަސް ދުވަހުގައި ކުރިޔަށްދާނީ، އުދުހުމުގެ ތަމްރީންތައް ކަމުގައި އޭނާ ވިދާޅުވިއެވެ.

އޭޕްރީލް އިންޓޭކްގައި ފަށާ މިކޯހުގައި ބައިވެރިވާން ބޭނުންވާ ފަރާތްތަކުގެ ކިބައިގައި ފުރިހަމަވާންޖެހޭ އަސާސީ ޝަރުޠުތަކުގެ ތެރޭގައި، އުމުރުން 17 އަހަރު ފުރިފައި ވުމާއި، މެޑިކަލްއިން ފާސްވުމާއި، ލެވެލް ނުވަތަ އެއާއި އެއްފެންވަރުގެ އިމްތިހާނަކުން ފިޒިކްސްއާއި މެތަމެޓިކްސް އާއި އިނގިރޭސި ފާސްވެފައިވުން ހިމެނެއެވެ. އެހެން ނަމަވެސް ސައިންސް ސްޓްރީމް ކިޔަވާފައި ނުވާ ދަރިވަރުންނަށްވެސް، މޯލްޑިވްސް އޭވިއޭޝަން އެކަޑަމީން ދޭ އިމްތިހާނު ފާސްވެގެން ކޯހުގައި ބައިވެރިވުމުގެ ފުރުޞަތު ލިބޭނެއެވެ.

ޕައިލެޓް ޓްރޭނިންގ ކޯހަކީ، ދުނިޔޭގެ ހުރިހާ ޤައުމެއްގައިވެސް އަގު ބޮޑު ކޯސްތަކެއް ނަމަވެސް މޯލްޑިވިއަން އޭވިއޭޝަންގެ އަގުތައް އެވްރެޖްކޮށް ދުނިޔޭގެ އެހެން ޤައުމުތަކާއި އަޅާބަލާއިރު ހެޔޮވާނެ ކަމަށާއި، އަދި ކޯހަށް ފައިސާ ދެއްކުމުގައި، ލުއިގޮތްތައް ހަމަޖައްސައިދެވިފައި ވާނެ ކަމުގައިވެސް ސުމާން ވިދާޅުވިއެވެ.

ސުމާން ވިދާޅުވީ ކޯހުގެ ފީ، ކޯހުގެ މުއްދަތުގެ ތެރޭގައި 4 އިންސްޓޯލްމެންޓަކަށް ބަހާލައިގެން ދެއްކޭނެ ކަމަށެވެ. އަދި ޕައިލެޓްކަން ކިޔަވާ ދަރިވަރުންނަށް، ސަރުކާރުން ހުޅުވާލި ސްޓޫޑެންޓް ލޯން ސްކީމްގައިވެސް 10 ފުރުޞަތެއް މިހާރު ހުޅުވާލާފައި އޮތުމާއިއެކު، ކޯހަށް ބޭނުންވާ ފައިސާ ދެއްކުމަށް އެއީވެސް އިޚްތިޔާރު ކުރެވޭނެ މަގެއް ކަމުގައި އޭނާ ވިދާޅުވިއެވެ.

މޯލްޑިވިއަން އޭވިއޭޝަން އެކަޑަމީއަކީ، 2021 ވަނަ އަހަރު އުފެއްދި އެކަޑަމީއަކަށް ވާއިރު، އެ އެކަޑަމީގައި މިހާރު ވަނީ، ޕައިލެޓުން ތަމްރީން ކުރުމުގެ 3 ބެޗް ނިމި، 35 ފަރާތުން، ޕައިލެޓް ލައިސަންސް ހޯދާފައެވެ. މިހާރުވެސް 28 ދަރިވަރަކު އެ އެކަޑަމީގައި ޕައިލެޓްކޯސް ފުރިހަމަ ކުރަމުންދާއިރު، އޭޕްރީލް މަހުގައި ފަށާ، ކޯހުގައިވެސް ފުރުޞަތު ދޭނީ، ގިނަވެގެން 28 ދަރިވަރުންނަށެވެ. މިކޯހަށް އެދި ހުށައެޅުމުގެ ސުންގަނޑިއަކީ، މި މާރިޗު މަހުގެ 31 ވަނަ ދުވަހެވެ. ކޯހާއި ގުޅޭ އިތުރު މައުލޫމާތު، 7914242 އަށް ގުޅުއްވައިގެންނާއި، މޯލްޑިވިއަން އޭވިއޭޝަން އެކަޑަމީގެ ސޯޝަލްމީޑިއާ އެކައުންޓްތަކުންނާއި، ވެބްސައިޓުން ލިބޭނެއެވެ.