ގދ. ވާދޫ ކައުންސިލްގެ ރައީސް އާއި ނައިބް ރައީސް ހިމެނޭހެން، އެ އިދާރާގެ ދުސްތޫރީ އޮނިގަނޑު ގެއްލުވައިލާފަދަ ބޮޑެތި އަދި ގިނަ ކުށްތަކެއް ކޮށްފައިވާތީ، އެ ކައުންސިލްގެ ހުރިހާ މެމްބަރުން މުސާރަ ނުލިބޭގޮތަށް ވަޒީފާގެ ޒިންމާތަކުން ދުރުކޮށްފިއެވެ.

ގދ. ވާދޫ ކައުންސިލްއާ ގުޅިގެން ލޯކަލް ގަވަމެންޓު އޮތޯރިޓީ (އެލްޖީއޭ)އަށް ލިބެމުން ދިޔަ ޝަކުވާތަކާ ގުޅިގެން، އެ އޮތޯރިޓީއިން ވަނީ އިންކުއަރީއެއް ހިންގާފައެވެ. އެގޮތުން، ވާދޫ ކައުންސިލްގެ 27 މައްސަލައެއް އެލްޖީއޭއިން ބަލާފައިވެއެވެ.

މި މައްސަލައާ ގުޅިގެން އެލްޖީއޭއިން ގެޒެޓުކުރި އެންގުމުގައި ބުނީ، އެ އޮތޯރިޓީއިން އިންކުއަރީ ކުރިޔަށް ގެންދިޔައީ ކައުންސިލް މެމްބަރުން ޖަވާބުދާރީވުމަށް ހަތް ދުވަހުގެ މުހުލަތެއް ދީގެން ކަމަށެވެ. އަދި މި އިންކުއަރީގައި ކައުންސިލްގެ ހުރިހާ މެންބަރުންނާއި މުވައްޒަފުންގެ ބަޔާން ނަގައި، ލިޔެކިއުންތައް ރަގަޅަށް ބަލައި މައުލޫމާތު ސާފުކޮށްފައިވާނެކަމަށް އެލްޖީއޭއިން ބުނެފައިވެއެވެ.

އެލްޖީއޭއިން ކައުންސިލްގެ ހުރިހާ މެމްބަރުންގެ މުސާރައާއި އިންޔަތްތައް ނުލިބޭގޮތަށް ސަސްޕެންޑު ކުރުމަށް ނިންމީ މައްސަލަ ރަގަޅަށް ދިރާސަކޮށްފައިކަމަށް ހާމަކޮށްފައިވެއެވެ.

އެލްޖީއޭއިން ހެދި އެންކުއެރީގައި ގދ. ވާދޫ ކައުންސިލާ ގުޅިގެން ބަލާފައިވާ 27 މައްސަލަ:

1.     ގދ. ވާދޫ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިދާރީ އިންތިޒާމުތައް ކައުންސިލުން ހަމަޖައްސާފައި ނެތުން

2.     ލާމަރުކަޒީ ގާނޫނާއި އިޖުރާއީ ގަވާއިދާއި އެއްގޮތަށް ކައުންސިލުގެ ބައްދަލުވުންތައް ބާއްވާފައިނުވުން.

3.     ކައުންސިލުގެ ބަޖެޓުން އިންކައިންޑް އަދި ފައިސާގެ ގޮތުގައި މާލިއްޔަތުގަ ގަވާއިދާ ލާމަރުކަޒީ ގާނޫނުގައި ބަޔާންކޮށްފައިވާ އުޞޫލުތަކާއި ޚިލާފަށް ޚަރަދު ކުރުން

4.     J-GOM ފަންޑުގެ ތެރެއިން ބޮޑު އަދަދެއް އަނެއް އަހަރުގެ J-GOM ފަންޑުގެ ތެރެއަށް ކެރީ ފޯވަރޑްކޮށްފައިވާކަން.

5.     މާލިއްޔަތުގެ ގަވާއިދާއި ހިލާފަށް ކައުންސިލުން ފައިސާ ބަލައިގަތުން

6.     ސިވިލް ސަރވިސްގެ ގަވާއިދުއާ އެއްގޮތަށް ކައުންސިލު އިދަރާގެ މުވައްޒަފުންގެ ހާޒިރީއާއި ރެކޯޑުތައް ބަލަހައްޓާފައިނެތުން

7.     އިޖުރާއީ ގަވާއިދާ އެއްގޮތައް ކައުންސިލުއިދާރީ އޮނިގަނޑު ފާސްކޮށް އޮނިގަނޑާ އެއްގޮތައް މުވައްޒަފުންނަށް މަސައްކަތް ހަވާލުކުރެވިފައި ނެތުން.

8.     ކައުންސިލުގެ އިދާރާގައި އާންމުން ވަނުންމަނާ ތަންތަނަށް އާންމުންނަށް ވަދެވޭ ގޮތަށް އިންތިޒާމުތައް ހަމަޖެހިފައި އޮތުން.

9.     ކައުންސިލުގެ ބައްދަލުވުމުގެ އެޖެންޑާ ފާސްކުރުން ބައްދަލުވުމުގެ އެޖެންޑާގައި ހިމެނިފައިނުވުމާއި ބައްދަލުވުމަށް އެޖެންޑާކުރުމަށް މެންބަރުން ހުށަހަޅާ މައްސަލަތައް ކައުންސިލުގެ ރައީސް އެޖެންޑާ ނުކުރުން

10.     ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައިވާ ގޮތުގެމަތިން ކައުންސިލުގެ މަސައްކަތު ތާވަލާއި ބަޖެޓް ފާސްކޮށް ހުށަހަޅާފައި ނެތުން

11.     ލޯކަލް ކައުންސިލްތަކުގެ އާންމު އިޖުރާއީ ގަވާއިދުއާ އެއްގޮތަށް ކައުންސިލަރުންގެ ހާޒިރީ ބަލަހައްޓާފައިނުވުމާއި، ހާޒިރީއާ ގުޅުންހުރި ސުލޫކީ މައްސަލަތައް.

12.     ކައުންސިލު އިދާރާ މުވައްޒަފުންގެ ހާޒިރީއާއި ގުޅުންހުރި މައްސަލަ

13.     ކައުންސިލުގެ ރައީސް ކައުންސިލު އިދާރާތެރޭ ދުންފަތުގެ އިސްތިއުމާލުކުރާ މައްސަލަ

14.     ކައުންސިލު އިދާރާގެ ކަންކަމާ ގުޅޭ މައުލޫމާތުތައް ރަސްމީ ޗެނަލުން ބޭރުން، ކައުންސިލުގެ ރައީސް ރައްޔިތުންނަށް މައުލޫމާތު ލީކްކުރާ މައްސަލަ

15.     ކައުންސިލުގެ ރައީސް، ކައުންސިލުގެ މުވައްޒަފުންނަކީ ދަށް ފަންތީގެ ބެއެއްކަމަށްބުނެ މުވައްޒަފުންގެ އަގުވެއްޓޭގޮތަށް މުވައްޒަފުންނާ ގުޅޭގޮތުން ދޮގު ވާހަކަތަކާއި ބޭއަދަބީ މެސެޖުތައް ކައުންސިލު ރަސްމީ ވައިބާ ގްރޫޕަށް ފޮނުވައި ސޯޝަލް މީޑިއާގައި އަދި ހޮޓާ ކެފޭތަކުގައި އެފަދަ ވާހަކަތައް ދައްކަމުންދާ މައްސަލަ

16.     ކައުންސިލު މުވައްޒަފުންނަށް އަޑުލައި ކަންކަމަށް މަޖުބޫރު ކުރުމާ މެންބަރުންގެ މެދުގައި ޖެހޭ މައްސަލަތަކުގެ ރުޅި ކައުންސިލު އިދާރީ މުވައްޒަފުންނަށް އަމާޒުކުރަމުންދާ މައްސަލަ

17.     ކައުންސިލު ބައްދަލުވުމުން ކަންކަން ނިންމުމުން އެކަންކަން ތަންފީޒުނުވާނެކަމަށް ބުނުމާއި، ބައްދަލުވުމުން ނިންމާ ނިންމުން ތަންފީޒު ނުވާ މައްސަލަ

18.     ކައުންސިލުން ގާނޫނު ނަންބަރު: 2010/7 (ދިވެހިރައްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނު) ގައިވާ ގޮތުގެމަތިން ރައްޔިތުންނަށް ޖަވާބުދާރީ ނުވާ މައްސަލަ.

19.     ސެކްރެޓަރީ ޖެނެރަލް މަސްއޫލިއްޔަތު އެންމެ ފުރިހަމަ ގޮތުގައި އަދާނުކުރުމާ، އެކި މުވައްޒަފުންގެ މެދުގައި ތަފާތުކުރުމާއި ކުދި ކުދި ކަންކަމުގައި މުވައްޒަފުންނަށް އިންޒާރުދޭ މައްސަލަ.

20.     ކައުންސިލު އިދާރާގެ ތެރޭގައި ކައުންސިލަރުން އެކަކު އަނެކަކު ގަޔަށް އަތްލައި މާރާމާރީ ހިންގާ މައްސަލަ

21.     ކައުންސިލަރުން ރަސްމީ ވަގުތާއި، ކައުންސިލުގެ އާންމު ބައްދަލުވުންތަކަށް ނުރަސްމީ ހެދުމުގައި ކައުންސިލަރުން ހާޒިރުވާ މައްސަލަ.

22.     ކައުންސިލަރުން ބޭއަދަބީ ބަހުރުވައިން ބައްދަލުވުންތަކާއި، މަސައްކަތުގެ މާހައުލުގައި ޒުވާބުކުރާ މައްސަލަ.

23.     ކައުންސިރުންގެ ފަރާތުން އިދާރާގައި މަސައްކަތްކުރާ އަންހެން މުވައްޒަފުންނަށް ޖިންސީ ފުރައްސާކުރާކަމުގެ މައްސަލަ.

24.     ކައުންސިލަރުން މުވައްޒަފުންގެ މަސައްކަތްތައް ހުރަސްއެޅޭ ގޮތަށް އަމަލުތައް ބެހެއްޓުން.

25.     ކައުންސިލު އިދާރާގައި ބައިބައިވުން އުފެދި، މުވައްޒަފުން މަސައްކަތް ކުރާނެ ރަނގަޅު މާހައުލެއްނެތުން.

26.     ކައުންސިލުގެ ރައިސް ހިންހަމަ ނުޖެހޭ މެންބަރުންގެ ޗުއްޓީ ހިފެހެއްޓުން.

27.     ކައުންސިލްގެ ރައީސްގެ ފަރާތުން ރަށުގައި އުޅޭ ބިދޭސީންނަށް ބިރުދައްކާ މައްސަލަ

ކައުންސިލްގެ ރައީސް، ނައިބް ރައީސް އަދި މެމްބަރުންނަށް އަޅާފައިވާ ފިޔަވަޅުތައް:

ކައުންސިލުގެ ރައީސް ހަސަން އަބްދުﷲ: މުސާރަ އާއި އިނާޔަތް ނުލިބޭ ގޮތަށް ތިން މަހަށް ސަސްޕެންޑުކުރުން

ކައުންސިލުގެ ނައިބު ރައީސް ހާޝިރު މުހައްމަދު: މުސާރަ އާއި އިނާޔަތް ނުލިބޭ ގޮތަށް ދެ މަހަށް ސަސްޕެންޑުކުރުން

ކައުންސިލް މެމްބަރު މުހައްމަދު ޝިފާގު: މުސާރަ އާއި އިނާޔަތް ނުލިބޭ ގޮތަށް ތިން މަހަށް ސަސްޕެންޑުކުރުން

ކައުންސިލް މެމްބަރު މާރިޔަތު އިބްރާހީމް: މުސާރަ އާއި އިނާޔަތް ނުލިބޭ ގޮތަށް އެއް މަހަށް ސަސްޕެންޑުކުރުން

ކައުންސިލް މެމްބަރު ސާރާ މުހައްމަދު: މުސާރަ އާއި އިނާޔަތް ނުލިބޭ ގޮތަށް ދެ މަހަށް ސަސްޕެންޑުކުރުން

ގދ. ވާދޫ ކައުންސިލް ރައީސްއަށް އިތުބާރު ނެތް ކަމަށް ބުނެ ކައުންސިލް ރައީސް ހަސަން އަބްދުﷲ މަގާމުން ވަކިކުރަން ރައްޔިތުންގެ ފަރާތުން ޕެޓިޝަނެއްގައި ސޮއިކޮށް ލޯކަލް ގަވަރމެންޓް އޮތޯރިޓީ (އެލްޖީއޭ) އަށް ވެސް 2022 ވަނަ އަހަރުގެ ޑިސެމްބަރު މަހު ހުށަހަޅާފައި ވެއެވެ. މި ޕެޓިޝަން ހުށަހެޅީ އާންމު ރައްޔިތުންނާއި ސިވިލް ސާވިސް މުވައްޒަފުންގެ އިތުރުން ރަށު ކައުންސިލަރުން ހިމެނޭހެން 449 މީހުންގެ ސޮޔާއެކުއެވެ.